“Əlimdə video var, Bayraq Meydanının rəhbərinə zəng edib dedim ki…”
Yayımlandı: 13 Yanvar 2023 13:06
Əmlakının zorla əlindən alındığını deyən şəxs indi təqsirləndirilən şəxs kimi məhkəmə qarşısındadır
“Azimport” şirkətinin rəhbəri, Azərbaycan Cüdo Veteranları Assosiasiyasının prezidenti Azər Əsgərova hədə-qorxu gəlib, onun yarım milyon pulunu almaqda ittiham olunan Kamal Akimov deyir ki, əksinə, özü bu işdə qurbandır. Onun sözlərinə görə, 10 il öncə “Azimport” şirkəti onun sənədli əmlakını söküb, kompensasiya ödəməyib. İllərlə məhkəmələrə, prezident də daxil olmaqla, müxtəlif dövlət orqanlarına şikayət edib. Son nəticədə 2016-cı ildə Azər Əsgərovla 800 min manata razılaşıblar. Bunun da 500 min manatını ödəyib, qalan 300 min manatını isə verməyib. Qalan məbləği ondan dəfələrlə tələb etsə də, Azər Əsgərov ödəməkdən imtina edib. Sonda isə ondan hüquq-mühafizə orqanlarına şikayət edib, indiyədək alınmış 500 min manatın özü və ailəsi hədələndiyinə görə verildiyini göstərib.
Kamal Akimov hazırda həbsdə olmasa da, Cinayət Məcəlləsinin 182.3.2 (külli miqdarda hədə-qorxu ilə tələb etmə) maddəsilə ittiham olunur. Onun işinə Bakı Ağır Cinayətlər Məhkəməsində baxılır.
Bu cinayət işində söhbət Səbail rayonu, Ziya Yusifzadə küçəsi (keçmiş Xanlar küçəsi) 8 ünvanında yerləşən, 146 kvadrat metrlik qeyri-yaşayış sahəsindən gedir.
Yanvarın 13-də keçirilən məhkəmə iclasında Kamal Akimov ifadə verib. O bildirib ki, sözügedən obyekti 2008-ci ildə alıb. 2012-ci ilin sentyabrında qardaşı ona xəbər verib ki, obyekti sökürlər:
“Qardaşım məndən soruşdu ki, oranı satmısan. Dedim ki, yox. Dedi ki, oranı sökürlər. Yarım saata özümü ora çatdırdım. Mənə dedilər ki, buranı almışıq. Dedim ki, necə almışıq? Buranın sahibi mənəm, heç kimə də satmamışam. Anlaşılmazlıq olduğunu bildirdilər, getdilər. Axşam eşitdim ki, yenə sökürlər. Getdim, bu dəfə də dedilər ki, operatorlar səhv edib, sağdakı obyektin əvəzinə soldakını söküb. Rəşad Məmmədova (Bayraq Meydanının keçmiş rəhbəri, “Azimport” şirkətinin ona məxsus olduğu iddia edilirdi) zəng elədim. Çünki söküntünü aparan maşınların bir neçəsinin üstündə “Azimport” loqosu vardı. Amma Rəşad Məmmədov mənə dedi ki, biz orada çox iş görsək də, söküntünün bizə aidiyyəti yoxdur”.
Kamal Akimovun sözlərinə görə, o, daha sonra məhkəməyə müraciət edib. 4-5 il məhkəmə çəkişməsi getsə də, onun xeyrinə qərar verilməyib. Paralel olaraq, o, dövlət orqanlarına da şikayət edib.
“2016-cı ildə mənimlə əlaqə saxlayıb, görüşmək istədiklərini bildirdilər. Azər Əsgərov gəlib görüşdü. Onda mənə sökülmüş obyektimin əvəzində 500 kvadratlıq obyektin 200 kvadratlıq hissəsini təklif etdi. Belə razılaşdıq ki, özü satsın onu. Mənə elə 800 min pul versin. 500 mini hissə-hissə verdi. Qalan 300 mini vermədi. Bir müddət sonra telefonlara da cavab vermədi. Sonra dedi, get, nə istəyirsən, elə. Mən qanuni yolla haqqımı tələb eləmişəm. Əlimdə əmlakımın “Azimport” tərəfindən sökülməsini sübut edən video var. Ona görə də “Azimport”dan pulumu tələb etmişəm, bu gün də tələb edirəm”, – təqsirləndirilən şəxs bildirib.
Zərərçəkmiş qismində tanınan Azər Əsgərov isə iddia edir ki, Kamal Akimov yalan danışır. Onun sözlərinə görə, Kamal Akimov onu və ailə üzvlərini hədələyib, avtomobillə qarşısını kəsib, bir neçə dəfəyə 500 min manatını alıb.
“Mən tikintini aparan şirkət olmuşam, ərazidə söküntü aparan şirkət olmamışam”, – Azər Əsgərov bildirib.
Kamal Akimov isə heç kimin qarşısını kəsmədiyini, qarşı tərəfin onun pulunu verməmək üçün həbs etdirməyə çalışdığını deyir.
Məhkəmə prosesi yanvarın 26-da davam edəcək.
