12 manatlıq ətdən hazırlanan dönər 1,5 manata necə satılır? – VİDEO
Ətin kiloqramının 12-13 manat olduğu bu günlərdə paytaxtda 1 manat 50, 1 manat 80 qəpiyə ət dönəri satılır. Bu qiymətləri müqayisə edənlərdə isə şübhə yaranır. Görəsən belə dönəri satanlar nə qazanc əldə edirlər ki, işlərinə davam edə bilirlər. Yoxsa onların satdıqı ət heç də təmiz ət deyil?
İnsanların sıx toplaşdığı yerlərdə cəmi 1,50 qəpiyə mal ətindən dönər satırlar. Halbuki, bazarlarda sümüksüz ətin bir kiloqramının qiyməti 12 manatdan başlayır. Peşəkar dönərçilər bildirir ki, bir kiloqram ətdən cəmi 10-11 dönər hazırlamaq mümkündür. Bu isə 16 manat pul edir. Belə olduqda isə bu ətin haradan gətirlidiyi və nə üçün bu qiymətə satıldığı maraq doğurur.
Elə bu sualın cavabını öyrənmək üçün dönərxanalara yaxınlaşırıq. Bizim gəldiyimizi görən dönərçi qaçaraq aradan çıxır. Dönərxanada çalışan digər işçilər isə suallarımızı cavablandırmaq istəmir. Peşəkar dönərçilər isə bu qiymətə təmiz dönər satmağın mümkün olmadığını bildirir.
Dönərlə bağlı dövlət standartı da mövcuddur. Standartlaşdırma, Metrologiya və Patent üzrə Dövlət Komitəsinin sözçüsü Fazil Talıblının sözlərinə görə, hazırda sahibkarlıq obyektlərinə yoxlamalar dayandırıldığından ciddi əsas olmadan onların fəaliyyətinə müdaxilə etməyə və sahibkarı cərimələməyə icazə verilmir. 2018 ci ilin yanvarın 1-dən etibarən Qida Təhlükəsizliyi Agentliyi tərəfindən bu məsələlərə daha ciddi nəzarət ediləcək. (“Xəzər TV”)
