Məhkəmə-Tibbi Ekspertiza və Patoloji Anatomiya Birliyinin direktoru: ”Ölüdoğulmuş 587 körpənin 14 faizi sahibsiz olub”

Saytların yığılması

Səhiyyə Nazirliyinin keçən il Məhkəmə-Tibbi Ekspertiza və Patoloji Anatomiya Birliyinə 3 237 meyit gətirilib.

Onlardan xəstəlikdən ölənlər 913 nəfər, zorakılıqla öldürülənlər 2 227 nəfər təşkil edib. 97 nəfərdə isə ölümün səbəbləri təyin edilməyib.

Bu barədə report.az-a danışan birliyin direktoru Ədalət Həsənov ölümlərin səbəbləri ya meyitin bədənində çürümə dəyişikliyi olması, ya da tamamilə yanaraq kömürləşməsi olub: 

Çünki meyit çürüyəndə ölümün səbəbini təyin edə bilmirik”.

O, zorakılıqla baş verən ölümlərin içərisində bədbəxt hadisələrin çoxluq təşkil etdiyini söyləyib:

“Belə ölümlərin sayı 1 494 olub. Bura suda boğulma, yol-nəqliyyat hadisələri, yanıq və s. hallar aiddir”.

Ədalət Həsənovun sözlərinə görə, meyitlər arasında sahibsiz olanlar da var:

“Sahibsiz meyitlər olduğu halda əgər yaxınlarından kimsə çıxmasa, Bakı Şəhər İcra Hakimiyyəti ilə əlaqə saxlanılır və meyitlər götürülüb aparılır. Ölümün səbəbinə görə sahibsiz meyitlərin saxlanma müddəti dəyişir. Belə meyitləri ən çoxu 10 gün saxlayırıq. Uşaqlar adətən xəstəxanalarda yenidoğulmuşlara, ya da ölü doğulanlara aiddir. Onların da çoxunu yiyəsi götürmür. Bunlar da sahibsiz meyitlər sırasına aid edilir”.

Direktor körpə uşaq meyitlərindən 14 faizinin sahibsiz olduğunu deyib:

“Bu da sırf yenidoğulmuşlar olub. Ölü doğulmuş, yenidoğulmuş, düşük faktlarının içərisindən 587 meyit olub ki, onlardan 71-i, yəni 14 faizi sahibsiz olub”.

“Birliyə intihar halı ilə gələn meyitləri müayinə etdikdən sonra bəzən onun qətlə yetirildiyi faktları da olub. Bu da gətirilən meyitlər arasında 1 və ya 2 nəfəri əhatə etmiş olur. Adətən belə hallar qəfləti ölüm kimi görünərək, xəstəlikdən və ya bədbəxt hadisə zamanı ölmüş kimi bilinir. Lakin meyitin müayinəsindən sonra aydın olur ki, zorakı ölüm halı baş verib” – deyə o, əlavə edib.

“Təcili tibbi yardım işçiləri ölüm faktına səbəb verə bilməzlər” – deyən Ədalət Həsənov vurğulayıb ki, onlar ölən şəxsin öldüyü ilə bağlı qeydlər edə bilər: 

“Sonradan müstəntiqə onun ölməsi ilə bağlı xəbər verilir. Meyiti hadisə yerindən yalnız ekspertiza əməkdaşları gətirir. Ölümün ilkin ehtimalını bizim ekspertlər deyir. Hərdən ola bilər ki, ekspertlər ilkin ehtimal üçün hansı səbəbdən ölüm halının ola biləcəyini nəzərdə tuturlar. Amma müayinədən sonra əksi də çıxa bilər”.

Birlik direktoru meyitin yarılma müddətinin fərqli olduğunu da bildirib:

 “Meyit var ki yarılması 1-3, 4 saat çəkir. Eləsi də var ki, meyitin yarılması dünəndən başlayıb sonrakı günə qədər davam edir. Məsələn, meyitin bədənində olan gülləni tapmaq olmur, əlavə rentgen gətiririk və stolun üzərində ola-ola onu rentgendən keçiririk və gülləni tapırıq. Bundan sonra da hələ meyitin müayinəsi davam edir. Meyit də olur ki, onun müayinəsi 1 sutka davam edir. Bu da çox nadir hallarda olur. Belə hal ildə təxminən 1-2 dənə olur. Ümumilikdə isə meyiti yarmaq üçün adətən 1-2 saat vaxt lazım olur”.