Tərtərdə döyüşlər gedən zaman nazirin konsertdə nə işi var? – Sosial etiraz
Məşhur italyan müğənnisi Eros Ramazzotti ötən gün Bakıda verdiyi konsert qızğın müzakirələrə yol açıb. ANS PRESS-in məlumatına görə, buna səbəb Bakı “Crystal hall”da baş tutan konserti izləməyə gələnlər arasında dövlət rəsmiləri, tanınmış simaların olmasıdır.
Onlar arasında xarici işlər naziri Elmar Məmmədyarov və AZAL-ın prezidenti Cahangir Əsgərov da yer alıb.
Qarabağda son günlər vəziyyətin gərginləşdiyi bir vaxtda dövlət rəsmilərinin əyləncəyə vaxt ayırması sosial şəbəkələrdə ciddi tənqid olunub. Sosial şəbəkə istifadəçiləri hazırda əyləncə və istirahətdənsə döyüşə köklənməyin vacib olduğunu qeyd edirlər.
Son iki gündə Ermənistan Silahlı Qüvvələrinin Azərbaycanın işğal olunmuş ərazilərindən Ağdam və Tərtər rayonlarının ərazilərini iri çaplı silahlardan və ağır artilleriya qurğularından atəşə tutulduğu vaxtda nazir, dövlət rəsmiləri və məmurların konsert kefi birmənalı qarşılanmır.
Məmurların hərəkətinə ictimayi qınaq sosial şəbəkələrdə həmçinin müxtəlif kollaj və karikaturalarla əksini tapır.
Müdafiə Naziri Zakir Həsənovun isə vəzifəsinə peşakar və məsüliyətli yanaşması oxucuları muharibədə zəfər qazanılacağına daha da ruhlandırır. Hərbi nazirin cəbhədə qarşı tərəflə üz-üzə olması, əsgərlərin yanında olması şəbəkə istifadəçiləri tərəfindən xüsusi rəğbətlə qarşılanır.