ABŞ-ın Suriyaya raket hücumu neft qiymətlərinə təsir edib
Neftin qiyməti ABŞ-ın raket hücumundan sonra yüksəlib
İlham Şaban: “Siyasi bəyanatlar və gərginliklər, müharibələr, onun fəsadları neftin qiymətinə təsir edir”
ABŞ-ın Suriya rejiminə qarşı təşkil etdiyi raket hücumunun qlobal maliyyə bazarlarında dalğalanma yaratmasıyla neftin qiyməti yüksəlib. Neft müqavilələri Nyu-Yorkda 1.9 faiz və Londonda 1.8 faizə qədər yüksəlib. Qərbi Texas neftinin qiyməti 52,70 dollaradək, Brent neftinin qiyməti isə 55.90 dollara qədər qalxıb.
ABŞ-dan bir rəhbər şəxs cümə günü erkən saatlarda keçirilən raket hücumunda Suriya təyyarələri və yanacaq tanklarının hədəf seçildiyini deyib. Suriya, Neft İxrac Edən Ölkələr Birliyinin (OPEK) ikinci ən böyük istehsalçısı İraqın sərhəd qonşusudur. Bu xəbər bütün maliyyə bazarlarında dalğalanmaya səbəb olub. Yen və qızılın qiyməti qalxıb, səhmlər ucuzlaşıb.
Analitiklər bildirirlər ki, Suriya böyük neft istehsalçısı deyil, ancaq bütün regionda riski potensial olaraq artır.
Suriyaya qarşı hərbi müdaxilə, Bəşər Əsəd rejiminin kimyəvi silah istifadə edərək çoxlu sayda mülki vətəndaşın ölümünə səbəb olmasından iki gün sonra baş verib. Suriyanın bu təcavüzü bütün dünyanın sərt reaksiyasına səbəb olub və prezident Donald Trump bunu “insanlığa təhqir” kimi qiymətləndirib.
İqtisadçı ekspert İlham Şaban baş verənləri şərh edərkən neftin qiymətinin öncədən də artdığını deyərək, onda da ABŞ-ın rolunun olduğunu söyləyir. Ehtiyatlar azaldığından bir müddət öncə qiymət artımı 51 dollardan 53 dollaradək yükşəlmişdi. Suriyadakı məlum hadisələrə gəlincə, ekspert bu amili neftin qiymətinə əlavə bir dəstək hesab edir:
“Qiymətlər 55-76 dollara qədər olsa da, indi korreksiya olunub. Hazırda, yəni sizinlə danışdığımız vaxtda neftin qiyməti 55.12 dollardır. Bu da neftin “qızdırılması” hesabınadır. Bu məqam davamlı olmadığı üçün ona “qızdırılma” deyilir”.
İ.Şaban neftin qiymətinə siyasi bəyanatların və gərginliklərin, müharibələrin, onun fəsadlarının təsir etdiyini deyir. Bu faktorların birjalara təsir göstərməsi nəticəsində analoji vəziyyət baş verir. Hazırda Suriyadakı hadisələrin də neftin qiymətinə təsiri danılmazdır.
Nigar
24saat.org
Mənbə – azadliq.info