ABŞ Senatı Çernoqoriyanın NATO üzvlüyünə qəbulu üçün son razılığını verib.
AzadlıqRadiosu yazır ki, alyansın bir qədər də Şərqə uzandığını göstərən bu addım böyük bir ehtimalla Rusiyanı qəzəbləndirəcək.
Martın 28-də keçirilən səsvermədə senatorlar 97-2 nisbəti ilə bu Balkan ölkəsinin NATO-nun 28-ci üzvü olmasına razılıq veriblər.
Çernoqriyanın alyansa üzvlüyünə razılığa dair daha iki NATO üzvü olan ölkədə – İspaniya və Hollandiyada da səsvemə keçirilməlidir, lakin ABŞ Senatındakı səsvermə həlledici hesab olunur.
Bundan əvvəl Moskva Çernoqoriyanın alyansa üzv olmasının qəti əleyhinıə olduğunu bildirmişdi.
Qonşusu Serbiya kimi Çernoqoriya da Rusiya ilə ortaq dil və mədəniyyət köklərinə malikdir. Üstəlik Kremlin dəstəklədiyi Oleq Deripaska da daxil bir sıra Rusiya zənginləri bu ölkəyə böyük investisiyalar yatırıblar.
Hətta Senat səsverməsindən əvvəl də Moskva bu addıma ciddi etirazını bildirmişdi.
Bir sıra Çernoqoriya siyasətçiləri Rusiyanı ötən il ölkədə baş vermis çevriliş cəhdinin arxasında durmaqda ittiham edirdilər.
Çernoqoriyanın NATO üzvlüyünə Vaşinqtonun dəstəyi lap əvvəldən güclü idi, lakin bəzi müşahidəçilər güman edirdilər ki, Donald Trump-ın Rusiyaya barışdırıcı münasibəti bu dəstəyi zəiflədə bilər.
Burası da var ki, Senatdakı səsverməyə baxmayaraq yekun sənəd Donald Trump tərəfindən imzalanmalıdır.
Lakin ABŞ dövlət katibi Rex Tillerson səsvermədən əvvəl Senat üzvlərinə yazmışdı ki, Çernoqoriyanın üzvlüyünə razılıq NATO-nun may ayına planlaşdırılmış sammitindən əvvəl verilməlidir.
Ötən həftə ABŞ-ın Avropadakı qüvvələrinin komandanı general Curtis Scaparrotti Senat komitəsinə bildirmişdi ki, Çernoqoriyanın üzvlük müraciətinin rədd edilməsi alyansa qoşulmaq istəyən başqa ölkələrə yanlış mesaj göndərə bilər.
Rusiyanın Balkanlardakı ən yaxın müttəfiqi Serbiya da son vaxtlar NATO ilə yox, amma Avropa İttifaqı ilə yaxınlaşmağa cəhd göstərir.
24saat.org
Mənbə – azadliq.org
