ABŞ üçüncü gündür Rusiyanın Kursk vilayətində hərbi əməliyyat keçirən Ukraynanı "qətiyyətlə dəstəkləyir"
Cümə axşamı ABŞ bildirib ki, Ukraynanın Rusiyanın təcavüzündən qorunmaq səylərini “qətiyyətlə dəstəkləyir”.
“Əgər Ukrayna hökuməti bu barədə danışmırsa, mən onların həyata keçirdiyi əməliyyat barədə danışmayacağam. Aydındır ki, biz Rusiyanın təcavüzündən qorunmaq üçün Ukraynanın səylərini qətiyyətlə dəstəkləyirik”,- Dövlət Departamentinin nümayəndəsi Metyü Miller Turan-ın sualının cavabında bildirib.
Bundan əvvəl Ukrayna prezidenti Vladimir Zelenski bildirib ki, Rusiya bu müharibənin nəticələrini “hiss etməlidir”.
Miller xatırladıb ki, Kreml Ukraynaya hücuma Kursk vilayətindən başlamışdı və ABŞ Kiyevin özünümüdafiə hüququnu dəstəkləyir.
Cümə axşamı Amerikanın müstəqil Müharibə Araşdırmaları İnstitutu bildirib ki, Ukrayna hücumun ilk iki günündə mühüm ərazi uğurlarına nail olub. Ukrayna qoşunları Kursk vilayətində içəriyə doğru xeyli irəliləyib və Rusiyanın ən azı iki müdafiə xəttini qırıb, İnstitutun məlumatında deyilir.
Ukrayna prezidentinin müşaviri Mixail Podolyak sosial şəbəkələrdə yazıb: “İmkansız olan mümkün oldu və mifik rus qəddarlığı Rusiyanın özünə qarşı çevrildi”.
