ABŞ və Rusiya müdafiə nazirləri danışıblar
Pentaqonun rəhbəri Lloyd Ostinlə Rusiyanın müdafiə naziri Sergey Şoyqu arasında telefon söhbəti olub.
Martın 15-də ABŞ-ın təşəbbüsü ilə keçirilən bu telefon danışığında Rusiya qırıcısı ilə Amerika dronunun Qara dəniz üzərində toqquşması müzakirə edilib.
Rusiya Müdafiə Nasirliyinin bu söhbət barədə rəsmi məlumatına görə Şoyqu deyib ki, insidentə “ABŞ-ın Rusiyanın Ukraynada keçirdiyi xüsusi hərbi əməliyyatla (Moskva Ukraynaya qarşı tammiqyaslı təcavüzünü belə adlandırır) bağlı elan etdiyi məhdud uçuş zonası rejimini pozmasına, habelə Rusiyanın maraqlarına qarşı kəşfiyyat fəaliyyətinin artmasına görə” baş verib.
Bundan başqa Şoyqu deyib ki, ABŞ dronlarının Krım yaxınlığında keçirdiyi uçuşlar “təxribat” xarakteri daşıyır və vəziyyətin eskalasiyası üçün şərait yaradır.
ABŞ Müdafiə Nazirliyinin məlumatına görə Ostin bunların cavabında deyib ki, insidentin səbəbi Rusiya pilotlarının “beynəlxalq hava məkanında qeyri-məqbul və qeyri-peşəkar hərəkətləridir”.
Ostin bir daha xatırladıb ki, Vaşinqton dünyanın əksər ölkələri kimi Krımın ilhaqını tanımır və yarımadanı Ukraynanın ərazisi hesab edir.
ABŞ müdafiə naziri Şoyquya xəbərdarlıq edib ki, Birləşmiş Ştatların təyyarə və dronları beynəlxalq hava məkanında beynəlxalq qanuna uyğun şəkildə uçuşlarını davam etdirəcək.
Martın 14-də ABŞ hökuməti ona məxsus dronun Qara dəniz üzərində Rusiyanın Su-27 qırıcısı ilə toqquşduğunu, nəticədə MQ-9 Reaper dronunun dənizə düşdüyünü xəbər vermişdi.
ABŞ bildirirdi ki, dron beynəlxalq hava məkanında uçuş tapşırığını yerinə yetirirdi.
Pentaqonun versiyalarından birinə görə Rusiya qırıcısı təhlükəli manevr edərkən dronun pərinə toxunub və bundan sonra ABŞ hərbi hava qüvvələri dronu vuraraq salmalı olub.
Rusiya tərəfi Su-27 ilə dron arasında hər hansı fiziki toxunmanın olduğunu inkar edir.
ABŞ rəsmiləri isə bildirirlər ki, belə bir toqquşma baş verib və ola bilsin, Rusiya qırıcısı da zədələnib.
Lakin ABŞ rəsmiləri Rusiya qırıcısının drona bilərəkdən toxunmadığını düşünürlər.
Bu da xəbər verilir ki, ABŞ insidentdən dərhal sonra məsafədən əlaqə ilə dronun yaddaşındakı məlumatı silib.
Bundan əvvəl Rusiya Təhlükəsizlik Şurasının katibi Nikolay Patruşev demişdi ki, Rusiya tərəfi sözü gedən dronun dənizin dibindən çıxarılmasına çalışacaq.
Patruşev deyib ki, bu dronun uçuşları ABŞ-ın Ukraynadakı hərbi əməliyyatlarda birbaşa iştirakını sübuta yetirib.
Lakin ABŞ Silahlı Qüvvələri Baş Qərargah Rəisləri Birləşmiş Komitəsinin sədri general Mark Milli dronun dənizin dibindən çıxarılmasının az qala mümkün olmadığını deyib:
“Dron ehtimal ki, böyük dərinliyə düşüb və onun qırıntılarının çıxarılması texniki baxımdan çox mürəkkəb olardı”.
O xəbərdarlıq edib ki, ABŞ qırıntıların səpələndiyi dəniz dibi sahəsinin ölçüsünü yalnız bir neçə gündən sonra müəyyən edə biləcək.
Bu qırıntıların 1219-1524 metr dərinliyə düşdüyü təxmin edilir.
