Ukrayna bildirir ki, Kiyev ətrafından qüvvələrini çəkən Rusiya yenidən qruplaşır, şərqi Donetsk və Luqansk regionlarını tam nəzarətə almağa çalışır
Apreli 8-də Avropa İttifaqının (Aİ) iki aparıcı rəsmisi Ukrayna paytaxtı Kiyevə Prezident Volodimir Zelenski ilə danışıqlara gedir. Həftənin əvvəlində Buça şəhərində rusiyalıların törətdiyi bildirilən vəhşiliklər haqda məlumat yayılandan bəri Qərb liderləri ilk dəfədir Ukraynaya səfərə çıxırlar.
Avropa Komissiyasının Prezidenti Ursula von der Leyen və birliyin baş diplomatı Cozep Borrel Polşanın kiçik, Ukrayna sərhədinin 13 km-də yerləşən Przemısl şəhərindən qatarla yola düşüblər. Ukraynanın hava məkanı müharibəyə görə bağlıdır.
Martın ortasında Polşa, Sloveniya və Çex Respublikasının baş nazirləri qatarla Kiyevə getmişdi. Ötən həftə isə Avropa Parlamentinin Prezidenti Roberta Metsola orada olub.
Yeni sanksiyalar gəlir
Qərb Kiyevdən şimalda yerləşən Buçada dinc sakinlərin qətlini pisləyib, Rusiyaya sanksiyaları sərtləşdirib. Rusiya isə ittihamları rədd edir, bunu Ukraynanın “provokasiyası” adlandırır.
Yerli rəsmilər Rusiya qüvvələrinin Buçada 300-dən çox insanı öldürdüyünü, onlardan 50-nin edam olunduğunu deyir.
Von der Leyen bu vəhşiliklərə cavab olaraq aprelin 5-də Rusiyaya beşinci sanksiya paketini təklif edib.
Mənbələrin dpa-ya dediyinə görə, Aİ-nin 27 üzvünün təmsilçiləri aprelin 7-də axşam layihəni dəstəkləyiblər. Layihəyə kömür, ağac, vodka idxalına qadağa da daxildir.
Borodyanka
Zelenski aprelin 7-də axşam deyib ki, Kiyevdən şimal-qərbdə Rusiya qüvvələrindən geri alınmış Borodyankada vəziyyət Buçadakından “xeyli daha qorxuludur”.
Borodyankadan yayılmış videoda xilasedicilər uçmuş binanın dağıntıları arasında qazıntı işləri aparırlar. Orada yüzlərlə insanın basdırıldığı güman edilir.
Şəhərlər atəş altında
Ukrayna bildirir ki, Kiyev ətrafından qüvvələrini çəkən Rusiya yenidən qruplaşır, şərqi Donetsk və Luqansk regionlarını tam nəzarətə almağa çalışır. Bu regionların bir hissəsi 2014-cü ildən Rusiyanın dəstəklədiyi separatçıların nəzarətindədir.
100 mindən çox insanın qaldığı bildirilən Mariupol liman şəhəri də hədəfdədir.
Britaniya Müdafiə Nazirliyinin aprelin 8-də yaydığı məlumata görə, Rusiya şərq və cənub hissələrdə şəhərləri atəş tutur. Rusiya qüvvələrinin öz nəzarətlərində olan İzyum şəhərindən cənuba doğru irəlilədikləri xəbər verilir.
Ukrayna bu gün dinc sakinlər üçün 10 humanitar dəhliz açmağı planlaşdırır, amma mühasirədə olan Mariupoldan sakinlər şəxsi maşınlarla çıxmalı olacaqlar.
Baş nazir müavini İrina Vereşçukun elan etdiyi 10 təhlükəsiz dəhlizin hamısı Ukraynanın cənub və şərq hissələrində açılmalıdır.