Bu gün, aprelin 6-da Bakıda Avropa Şurası və Avropa Birliyinin (AB) “Azərbaycan məhkəmələrinin səmərəliliyinə yardım, hakimlərin təhsilinin təkmilləşdirilməsi, məhkəmələrin özünüidarəsi” mövzusunda birgə layihəsinin başa çatmasına həsr olunmuş yekun konfrans keçirilib.

Layihə AB-nin “Şərq tərəfdaşlığı” Proqramı çərçivəsində həyata keçirilib.

Saytların yığılması

İki illik layihə Azərbaycanın Avropa Şurası qarşısında insan hüquqlarına, qanunun aliliyinə və demokratik prinsiplərə riayət olunması üzrə öhdəliklərinə uyğun olaraq reallaşdırılıb.

Təşkilatçılar bildirir ki, layihə çərçivəsində pilot məhkəmələrdə (apellyasiya məhkəmələrində) CEPEJ – Ədalətli mühakimənin səmərəliliyi məsələləri üzrə Avropa Komissiyasının standartları tətbiq olunub.

Konfransın açılışında çıxış edən Avropa Şurasının Bakı ofisinin rəhbəri Draqana Filipoviç qeyd edib ki, layihənin həyata keçirilməsi Azərbaycanın məhkəmə sisteminin inkişafından ötrü onunla sıx əməkdaşlığa şərait yaratmaq imkanı verib.

“Layihənin məqsədi məhkəmə sistemində islahatlar aparmaqdan ötrü potensialı gücləndirmək idi”, deyə o bildirib.

D.Filipoviç vurğulayıb ki, Avropa İnsan Hüquqları Məhkəməsinə müraciətlərin sayını azaltmaqdan ötrü milli məhkəmə sistemi inkişaf etdirilməlidir.

“Bütünlükdə milli məhkəmə sistemləri Avropada qəbul edilmiş standartlara uyğun olmalıdır”, deyə o bildirib.

Avropa Şurası insan hüquqları və qanunun aliliyi üzrə baş direktorunun ədliyyə, hüquqi əməkdaşlıq departamentinin rəhbəri Hanna Yunker qeyd edib ki, Azərbaycanda da etibarlı, əlçatan, mübahisəli məsələlərin keyfiyyətli həllinə şərait yaradan məhkəmə sisteminin yaradılmasıdır.

Avropa Birliyinin Azərbaycandakı nümayəndəliyinin əməkdaşlıq şöbəsinin müdiri Ceron Vilems qeyd edib ki, hazırda Azərbaycanda iqtisadiyyatın şaxələndirilməsi haqqında müzakirələr əhəmiyyət kəsb edir.

“Bundan ötrü ədalətli məhkəmə sisteminin olması çox vacibdir. Məhz belə məhkəmə sistemi iqtisadi islahatlara şərait yaratmalıdır”, deyə o qeyd edib.