Azərbaycan-Ermənistan sərhəddində silahlı toqquşma olub, hər iki tərəfdən itkilərin olduğu bildirlir
Hər iki tərəfdən itkilərin olduğu bildirilir, tərəflər bir -birini ittiham edir
“Sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib”.
Bu barədə Azərbaycanın Müdafiə Nazirliyi məlumat yayıb. Məlumatda deylir:
“Ermənistan silahlı qüvvələrinin diversiya qrupları sutkanın qaranlıq vaxtında ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan Ordusunun bölmələrinin mövqeləri arasındakı əraziləri və təminat yollarının minalanmasını həyata keçirib”.
Nazirlik bildirir ki, bunun qarşısını almaq üçün Azərbaycan ordusu tərəfindən görülən təxirəsalınmaz tədbirlər nəticəsində döyüş toqquşması baş verib.
Məlumatda qeyd olunur ki, Ermənistan silahlı qüvvələri tərəfindən Azərbaycan Ordusunun Daşkəsən, Kəlbəcər və Laçın rayonları ərazisindəki bəzi mövqeləri, sığınacaqlar və dayaq məntəqələri müxtəlif çaplı silahlar, o cümlədən minaatanlardan intensiv atəşə tutulub.
“Nəticədə şəxsi heyət arasında itkilər var, hərbi infrastruktura ziyan dəyib”- nazirliyin məlumatında deyilir.
Nazirliyin məlumatında daha sonra deyilir ki, Azərbaycan hərbi qulluqçularının, o cümlədən Kəlbəcər və Laçın rayonları ərazisində infrastruktur işlərinə cəlb olunmuş mülki işçilərin təhlükəsizliyinin təmin edilməsi məqsədilə Azərbaycan Ordusunun bu istiqamətdə dislokasiya olunan bölmələri tərəfindən qəti cavab tədbirləri görülür.
“Təxribat əməliyyatlarına cəlb olunmuş Ermənistan silahlı qüvvələrinin canlı qüvvəsi və döyüş texnikası sırasında itkilər vardır”
Məlumatda həmçinin vurğulanır ki, son bir ay ərzində Ermənistan silahlı qüvvələrinin dövlət sərhədinin Laçın, Gədəbəy, Daşkəsən və Kəlbəcər rayonları istiqamətində təxribatları, Azərbaycan Ordusunun həmin rayonların ərazisindəki mövqelərinin müxtəlif çaplı silahlardan atəşə tutulması halları intensiv və sistematik xarakter daşıyırdı. Eyni zamanda Ermənistan tərəfindən Azərbaycan sərhədləri boyunca hücum təyinatlı silahları, ağır artilleriya vasitələrini və şəxsi heyəti cəmləşdirməsi müşahidə olunmaqda idi.
“Ermənistan bu kimi əməlləri ilə eləcə də Azərbaycanın işğaldan azad edilmiş sərhədyanı rayonlarda həyata keçirdiyi irimiqyaslı mülki infrastruktur layihələrinin icrasını ləngitmək və Azərbaycan sərhədləri yaxınlığında gərginlik mühitini saxlamaq məqsədini güdür”
Azərbaycan Müdafiə Nazirliyi bildirir ki, “baş vermiş təxribat, qarşıdurma və itkilərə görə bütün məsuliyyət Ermənistanın hərbi-siyasi rəhbərliyinin üzərinə düşür”
Ermənistan Müdafiə Nazirliyin mətbuat katibi isə sentyabrın 13-də saat 00:05-də Azərbaycan Silahlı Qüvvələrinin bölmələri Qoris, Sotk və Cermuk istiqamətində Ermənistan silahlı qüvvələrinin mövqeləri istiqamətində artilleriya vasitələrindən və iriçaplı tüfənglərdən intensiv atəşə tutduğunu bildirib. Bu barədə Azadlıqradiosunun erməni xidməti məlumat yayıb.
Nazirlikdən həmçinin Azərbaycan tərəfinin zenit raketlərindən istifadə etdiyi bildirilib.
Azərbaycan və Ermənistan liderləri bu il Şarl Mişelin vasitəçiliyi ilə 3 görüş keçiriblər. 31 avqust görüşündə iki ölkənin xarici işlər nazirlərinə sülh sazişinin mətni üzərində işləmək tapşırılıb.
Azərbaycan 2020-ci ildə 44 günlük savaş nəticəsində Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.
Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qalıb. Amma, hələlik, tərəflər arasında sülh sazişi imzalanmayıb.
