Bu gün, aprelin 7-də Bakıda Azərbaycan-Estoniya biznes forumu keçirilib. Tədbir nəqliyyat, Rabitə və Yüksək Texnologiyalar Nazirliyinin, İxracın və İnvestisiyaların Təşviqi Fondunun təşkilatçılığı ilə gerçəkləşib.

Biznes-forumda hər iki ölkənin sahibkarları arasında iqtisadiyyatın müxtəlif sahələri üzrə əməkdaşlığın mövcud vəziyyəti və gələcək perspektivləri barədə müzakirələr aparılıb.

Saytların yığılması

Günün birinci yarısında həmçinin, iki ölkə hökumətlərinin birgə komissiyasının 3-cü toplantısı keçirilib.

Toplantıda iki ölkə arasında sənaye, energetika, nəqliyyat, informasiya-kommunikasiya texnologiyaları (İKT), maliyyə, gömrük, vergi, kənd təsərrüfatı və digər sahələrdə əməkdaşlıq məsələləri müzakirə edilib.

Müzakirələr komissiyanın rəhbərləri – nəqliyyat, rabitə və yüksək texnologiyalar naziri Ramin Quluzadə və Estoniyanın dövlət idarəçiliyi naziri Mixail Korbun rəhbərliyi ilə aparılıb.

İclasda iqtisadi əməkdaşlıq məsələləri əsas diqqət mərkəzində olub. Yeni texnologiyalardan istifadə məsələlinin müzakirəsi zamanı R.Quluzadə Azərbaycanda 3G, 4G və digər yeni texnologiyaların tətbiq edilməsindən danışıb. O, Azərbaycanda internetə ən müasir çıxış imkanlarının yaradıldığını bildirib.

“Azərbaycan əhalisinin 78 faizi internet, onların 72 faizi isə geniş zolaqlı internet istifadəçisidir”, nazir bildirib.

Estoniyalı nazir isə çıxışında iki ölkə arasında əməkdaşlığın gücləndirilməsinin vacibliyindən danışıb.

Onun sözlərinə görə, iki ölkənin dəmiryolu idarələri əməkdaşlıq sazişi imzalayıblar. Həmin sənədə əsasən, iki ölkə arasında məhsullar şimaldan cənuba, o cümlədən əks istiqamətə daşınacaq.