Azərbaycan müxalifəti xarici qoşunların Qazaxıstandan çıxarılmasını tələb edib
Bakı/09.01.22 Azərbaycanın Demokratik qüvvələrinin Milli şurası Kollektiv Təhlükəsizlik Müqaviləsi Təşkilatının Qazaxıstana hərbi qüvvə yeritməsi ilə bağlı bəyanatla çıxış edib.
Qurumun sədri Cəmil Həsənli tərəfindən yayılan sənəddə deyilir:
“Məlum olduğu kimi, Qazaxıstanda xalq etirazları (sonradan dağıdıcı
hallarla da müşaiyət olunmaqla) fonunda bu ölkənin prezidenti Qasım
Comərd Tokayev Qazaxıstanın da üzv olduğu Kollektiv Təhlükəsizlik
Müqaviləsi Təşkilatına (KTMT) muraciət edərək, hərbi qüvvə yardımı
istəyib və əsasən Rusiya hərbçilərindən təşkil olunan hərbi kontingent
yanvarın 6-dan etibarən Qazaxıstana yeridilib.
Milli Şura olaraq bildiririk ki, KTMT-in öz sənədlərində də bu hərbi
ittifaqın müdafiə xarakterli olduğu və üzv dövlətlərdən hər hansı
birinə yalnız həmin dövlət xarici hərbi müdaxiləyə məruz qalacağı
təqdirdə hərbi yardım göndərə biləcəyi qeyd edilir. Qazaxıstana hər
hansı hərbi müdaxilə olmayıb, ona görə də KTMT-in ora ordu göndərməsi
hətta öz daxili nizamnamə qaydalarına əsasən də qanunsuzdur.
Qazaxıstan Respublikasının konstitusiyasına görə, dövlət başçısının
hətta öz ordusundan belə xalqa qarşı istifadə etmək səlahiyyəti
yoxdur. Bu baxımdan prezident Tokayevin başqa dövlətlərin ordusunu
təkbaşına öz ölkəsinə çağırması səlahiyyət həddinin aşılmasıdır.
Müvafiq dövlətlərarası saziş, parlamentin razılığı olmadan xarici
ölkələrdən öz xalqına qarşı hərbi yardım almaq Qazaxıstanın özünün də
suveren qanunvericiliyinə ziddir.
Bizi ən çox narahat edən odur ki, Azərbaycana dost-qardaş saydığımız
Qazaxıstanın dövlət suverenliyi bu şəkildə məhdudlaşdırılır.
Perspektivdə onun həm müstəqilliyi, həm də ərazi bütövlüyü üçün
müəyyən təhlükələrin əlamətləri görünür. Bizi həm də o narahat edir
ki, Rusiyanın liderlik etdiyi KTMT xalqları tərəfindən seçilməyən,
dəstəklənməyən və dəyişdirilməsi istənilən, xalqlarından mandat
almayan avtoritar liderlərin zor gücünə müdafiəsini öz üzərinə götürən
bir quruma çevrilir. Hesab edirik ki, KTMT-ə üzv dövlətlər həm
bir-birinin, həm də başqa dovlətlərin suveren hüquqlarına diqqətlə
yanaşmalı, heç bir xalqın fundamental hüquqlarının pozulmasında vasitə
olmamalıdırlar.
Bizi bütövlükdə Qazaxıstanda baş verənlər ciddi şəkildə narahat edir.
Təbii ki, Qazaxıstanda kütləvi etirazların, sonradan artıq zor
müstəvisinə keçmiş qarşıdurmanın yaranmasına əsas səbəb ölkədə sosial
problemlərin kəskinləşməsi və uzun illər ərzində hüquq və
azadlıqlarının məhdudlaşdırılması olub. Hesab edirik ki, dost və
qardaş qazax xalqı, Qazaxıstan hökuməti nə qədər çətin olsa da,
qarşılıqlı dialoq, bir-birini eşitmək yolu ilə ölkədə fundamental
hüquqları, xüsusən də sərbəst toplaşmaq azadlığını, çoxpartiyalı
sistemi, qanunun aliliyini, azad mətbuatı real surətdə təmin etməklə
daxili problemlərini özləri həll etmək iqtidarında olmalıdırlar. Biz
Qazaxıstanda xalqla hakimiyyət arasında hazırda yaşanan gərginliyə
kənar müdaxilələri zərərli hesab edirik. Hesab edirik ki, yaranmış
situasiyadan heç bir xarici qüvvə, indiki halda KTMT Qazaxıstanın
daxili işlərinə qarışmaq, oraya ordu yeritmək üçün istifadə etmək
fikrinə düşməməlidir. Hesab edirik ki, ən qısa müddətdə kənar ordular
Qazaxıstanı tərk etməlidir, Qazaxıstan öz problemlərini öz daxilində
həll etməyi bacarmalıdır.
Milli Şura olaraq prezident Tokayevin terrorçu adlandırdığı
etirazçılara xəbərdar etmədən atəş açmaq əmri verməsini
qeyri-proporsional güc tətbiqi hesab edərək, qınayırıq. Qazaxıstan
hakimiyyətini və etirazçıları qarşılıqlı şəkildə zorakılıqdan, qan
tökülməsindən imtinaya çağırırıq. Hesab edirik ki, ölkədaxili
qarşıdurmanı dayandırmanın yolu qarşılıqlı kompromisdən, dialoqdan və
qazax xalqının fundamental hüquq və azadlıqlarına hörmət olunmasından
keçir».—06-
Turan
“24 saat”