Siyasət
Azərbaycan Naxçıvandan Türkiyəyə ixrac üçün güzəşt əldə etmək istəyir
Azərbaycan Türkiyə ilə Naxçıvan Muxtar Respublikasında istehsal olunan malların tədarükü zamanı gömrük güzəştləri əldə etmək üçün danışıqlar aparır.
Bu barədə Trend-ə iqtisadiyyat nazirinin müavini Sahil Babayev deyib.
Nazir müavini qeyd edib ki, Türkiyədə, xüsusilə də aqrar məhsulların gətirilməsinə görə gömrük rüsumları çox yüksəkdir: “Biz Türkiyəyə ixracı genişləndirmək üçün danışıqlar aparırıq. Bu kontekstdə Naxçıvan MR-də istehsal olunan malların Türkiyəyə ixracına görə güzəşt əldə etmək istəyirik”.
S.Babayev bildirib ki, söhbət Türkiyəyə müxtəlif məhsullar, o cümlədən mineral suların tədarükündən gedir: “Azərbaycan danışıqların qısa müddətdə başa çatacağına ümid edir”.