Birinci vitse-prezident Mehriban Əliyeva –Ona hansı səlahiyyətlər verildi?
Prezident İlham Əliyevin sərəncamı ilə Heydər Əliyev Fondunun rəhbəri, deputat Mehriban Əliyeva 1-ci vitse prezident təyin olunub.
Strateq.az bildirir ki, bu təyinat ötən ilin sentyabrın 26-da keçirilmiş referendumdan sonra mümkün olub.
Səsverməyə çıxarılmış Referendum Aktında vitse-prezidentlik təsisatı öz əksini tapmışdı.
Bəs vitse-prezidentlik postu özündə nəyi ehtiva edir?
Azərbaycan Prezidenti vaxtından əvvəl vəzifədən getdikdə, 60 gün müddətində növbədənkənar Azərbaycan Respublikasının Prezident seçkiləri keçirilir. Bu halda yeni prezident seçilənədək, Azərbaycan Respublikasının prezident səlahiyyətlərini 1-ci vitse-prezident icra edir. Bu müddət ərzində 1-ci vitse-prezident istefa verdikdə, səhhətinə görə öz səlahiyyətlərini icra etmək qabiliyyətini tamamilə itirdikdə, Azərbaycan Respublikasının vitse-prezidenti 1-ci vitse-prezident statusu almış olur və Azərbaycan Prezidentinin səlahiyyətlərini icra edir.
Bu maddənin II hissəsində göstərilən səbəblərə görə Azərbaycan Respublikası Prezidentinin səlahiyyətlərini Azərbaycan Respublikasının Birinci vitse-prezidentinin icra etməsi mümkün olmadıqda, Azərbaycan Respublikası Prezidentinin səlahiyyətlərini Azərbaycan Respublikasının Baş naziri icra edir.
Qanuna Azərbaycan Respublikası vitse-prezidentlərinin toxunulmazlığı adlı yeni maddə əlavə olunub:
I. Səlahiyyət müddəti ərzində Azərbaycan Respublikasının vitse-prezidentinin şəxsiyyəti toxunulmazdır.
II. Azərbaycan Respublikasının vitse-prezidenti cinayət başında yaxalanma hallarından başqa tutula bilməz, cinayət məsuliyyətinə cəlb edilə bilməz, onun barəsində məhkəmə qaydasında inzibati tənbeh tədbirləri tətbiq edilə bilməz, axtarışa məruz qala bilməz, şəxsi müayinə edilə bilməz.
III. Azərbaycan Respublikasının vitse-prezidenti cinayət başında yaxalanarsa, tutula bilər. Belə olduqda onu tutan orqan bu barədə dərhal Azərbaycan Respublikasının Baş prokuroruna xəbər verməlidir.
IV. Azərbaycan Respublikasının vitse-prezidentinin toxunulmazlığına yalnız Azərbaycan Respublikası Baş prokurorunun təqdimatına əsasən Azərbaycan Respublikası Prezidenti tərəfindən xitam verilə bilər.
Azərbaycan Respublikasının Birinci vitse-prezidentinin təminatı haqqında əlavə olunmuş maddədə deyilir ki, Azərbaycan Respublikasının Birinci vitse-prezidenti və onun ailəsi dövlət hesabına təmin edilir. Azərbaycan Respublikasının Birinci vitse-prezidentinin və onun ailəsinin təhlükəsizliyini xüsusi mühafizə xidmətləri təmin edir.
