”Bizə mane ola biləcək bir şey varsa, o da ‘Qəbələ’di” – ”Lill”in baş məşqçisi
“İlk oyundan müəyyən nəticələr çıxarmışıq. Sabah baş tutacaq matçda komandamızın nəyə qadir olduğunu sübuta yetirəcəyik”.
Apasport.az-ın yaydığı xəbərə görə, bu sözləri “Lill” klubunun baş məşqçisi Frederik Antonetti Avropa Liqasının III təsnifat mərhələsində “Qəbələ” ilə cavab görüşü öncəsi deyib.
Matçdan öncə mətbuat konfransı keçirən Antonetti bunları bildirib:
“Futbolçularımızın bəziləri ilk oyunda iştirak etmədilər. Lakin sabah onlar meydanda olacaq. “Qəbələ” ilə cavab görüşü ilə bağlı proqnoz verə bilmərəm”.
– Fransada “Qəbələ”dən o cür yaxşı oyun gözləyirdizmi?
– Bəli, gözləyirdik. Çünki “Qəbələ” güclü komandadı. Biz oyundan əvvəl də onların nəyə qadir olduğunu bilirdik. Çünki bu komandanın matçlarını izləmişdik. “Qəbələ”nin məqsədi nədisə, sabah bizim məqsədimiz də elə olacaq.
– Sabah “Lill”in ifasında hücum futbolu görəcəyikmi?
– Bizim öz taktikamız var. Hücum futbolu ola da bilər, olmaya da.
– Ederə əsas heyətdə şans verəcəksizmi?
– Böyük ehtimalla, bəli.
– Portuqaliyalı hücumçuya cavab görüşündə şans verməyiniz “Qəbələ”nin ilk oyunda gözünüzü qorxutması ilə bağlıdır?
– Eder öz mövqeyində oynayır. Onunla 10 aydan çoxdur ki, əməkdaşlıq edirik.
– Sofyan Bufali keçən mövsüm komandanın liderlərindən idi. Onun yoxluğunda “Lill”in taktikası dəyişibmi?
– Təbii ki, onun oyunundan razıyıq. Lakin Bufalinin olmaması komandamıza öz təsirini göstərir.
– Sabah uğura nə mane ola bilər?
– Bizə mane ola biləcək bir şey varsa, o da “Qəbələ” komandasıdır.
