Yaponiya Müdafiə Nazirliyi Şimali Koreyanın atdığı 3 raketdən birincisinin Yaponiya üzərindən keçərək Sakit okeana düşməsi barədə məlumatın geri götürüldüyünü bildirib. Bildirilib ki, raket radarlardan itib və Yaponiya üzərindən keçməyib. İlk raketin Yapon dənizinə (Şərq dənizi) düşdüyü təxmin edilir.
NHK dövlət televiziyası Şimali Koreyanın yerli vaxtla 07:51, 08:41 və 08:51-də buraxdığı raketlərin Yapon dənizinə (Şərq dənizi) düşdüyünü açıqlayıb.
İlk raketdən sonra Yamaqata, Niigata və Miyaqi əyalətlərində fəaliyyətə başlayan “J-Alert” erkən xəbərdarlıq sisteminin mesajında insanlardan binalarda qalmaları istənilib.
Bildirilib ki, üç əyaləti əhatə edən ictimaiyyətə xəbərdarlıq “raketin Yaponiyaya doğru yaxınlaşdığı müşahidə edildikdən sonra” edilib.
Yaponiyanın baş naziri Kişida Fumio jurnalistlərə açıqlamasında raket sınaqlarını “dözülməz” adlandırıb.
Baş nazir Kişida, atılan ilk raketin qitələrarası ballistik tipli raket (ICBM) olduğu təxmin edildiyini söylədi.
Kişida qeyd edib ki, ABŞ və Cənubi Koreya ilə əməkdaşlıq əks hərəkətlər etməyə davam edəcək.
Bundan başqa, qeyd edilib ki, sınaqlardan sonra bölgə boyu hərəkət edən dəniz və təyyarələrə heç bir ziyan dəyməyib.
Müdafiə naziri Hamada Yasukazu “(ilk raketin) radardan itməsinin səbəbinin araşdırıldığını” açıqlayıb.
Digər tərəfdən, Yaponiya Sahil Mühafizəsi (KAIHO) ilk sınaqdan sonra Şimali Koreyanın daha iki raket atdığını açıqlayıb.
Daha iki raketin Yapon dənizinə (Şərq dənizi) düşdüyü bildirilir.
Cənubi Koreyanın Birləşmiş Qərargah Rəisləri Şimali Koreyanın orta və ya uzaq mənzilli ballistik raketi sınaqdan keçirdiyinin təxmin edildiyini açıqlayıb.
Şimali Koreya sonuncu dəfə 2017-ci ilin sentyabrında və keçən ayın əvvəlində Yaponiya üzərindən keçərək Sakit okeana düşən raketi sınaqdan keçirib.
Mənbə: AA
Tərcümə“24 SAAT”