Çexiyada seçkini kim udacaq
Çexiyada prezidentliyə iki namizəd cümə və şənbə günləri bir daha yarışmaya gedir. “Frans Pres” agentliyi yazır ki, son rəy sorğuları rusiyapərəst prezident Milos Zeman-la avropapərəst akademik Jiri Drahos arasında yarışmanın xeyli sərt keçəcəyini göstərir.
47 vs. 43 FAİZ
73 yaşlı keçmiş kommunist Zeman kənd yerlərində məşhurdur və antimüsəlman ritorikasıyla tanınır. O, 12-13 yanvar tarixlərində doqquz namizədin qatıldığı seçkidə səslərin 38,56 faizini toplayıb.
68 yaşlı, Çexiya Elmlər Akademiyasının keçmiş rəhbəri Drahos isə səslərin 26,6 faizini yığıb. O, daha çox Praqada və digər iri şəhərlərdə dəstək qazanıb.
Təhlilçilər Drahos-un seçkinin ikinci turunda azacıq fərqlə üstünlük qazanacağını düşünürlər, belə ki, birinci raunddan çıxmış namizədlər də akademiki dəstəkləyiblər.
Bazar ertəsi DNES qəzeti bir sorğuya istinadla yazıb ki, seçicilərin 47 faizi “mütləq” Drahos-u, 43 faizsə Zeman-ı dəstəkləyəcək.
STEM/MARK agentliyi sorğunu ötən həftə 1078 səsvermə yaşında olan respondent arasında keçirib.
50 FAİZDƏN ARTIĞI YIĞAN OLACAQMI
“Hələlik, iki namizədin heç biri səslərin 50 faizindən artığını yığa bilməyib”, – yazan DNES “aşırı həyəcanlı” qarşıdurma olacağını yazır.
Sorğunun nəticələrinə görə, seçkiyə gedəcək şəxslərin 10 faizə qədəri hələ qərarını verməyib.
Kantar TNS və Median agentliklərinin Çexiya Televiziyası üçün keçirdiyi sorğuya görəsə, çexlərin 45,5 faizi Zeman-a, 45 faizi isə Drahos-a səs verəcək. Bu sorğu bazar günü açıqlanıb.
“1522 respondentin 9,5 faizi hələ qərarını verməyib”, – Kantar TNS-in təhlilçisi Pavel Ranocha deyib.
“Reflex” həftəlik nəşri isə birinci raundda uduzmuş namizədlərin göstəricilərini detallı təhlil edərək iki namizədin seçkini 50-50 ilə başa vuracağını bildirir.
Zeman və Drahos yanvarın 23-də və 25-də TV debata çıxacaqlar.
Seçkinin ikinci raundu cümə və şənbə günləri keçiriləcək, nəticələr şənbə günortadan sonra açıqlanacaq.