Çindən Serbiyaya silah daşıyan təyyarələr Bakıda da eniş edib?
Serbiya bu raketlərin alınması üçün Çinlə müqaviləni 2020-ci ildə imzalayıb və həmin kontrakta Çin istehsalı CH-92 dronları da daxildir
Çin Serbiyaya antitəyyarə raket sistemləri çatdırıb.
Associated Press yazır ki, Serbiya ilə Çin arasında bir neçə il bundan əvvəl bağlanmış kontrakta görə hərbi yükün içində döyüş dronları da olub.
Çin Xarici İşlər Nazirliyinin sözçüsü Jao Lijian aprelin 11-də deyib ki, sözügedən yük iki ölkə arasında illik əməkdaşlıq planına əsasən göndərilib və üçüncü ölkələrə qarşı istifadə üçün nəzərdə tutulmayıb, habelə Avropada hazırkı vəziyyətlə bağlı deyil.
Jao bundan artıq təfərrüat bildirməyib.
Ehtimal edilir ki, Serbiyaya ötən həftəsonu çatdırılmış yük FK-3 ortamənzilli, səyyar yer-göy raketləri batareyasıdır.
Serbiya bu raketlərin alınması üçün Çinlə müqaviləni 2020-ci ildə imzalayıb və həmin kontrakta Çin istehsalı CH-92 dronları da daxildir.
The Associated Press yazır ki, Serbiya prezidenti Aleksandar Vuçiç FK-3 batareyasının gətirildiyinə dair suallara cavab verməyib.
O deyib ki, Serbiya hərbiyyəsinin “yeni iftixarı” barədə bugünlərdə bəyanat verəcək.
6 təyyarə
Bu da xəbər verilir ki, FK-3 raketləri HQ-22 yer-göy raket sisteminin ixrac modifikasiyasıdır və buna görə də onun vurma məsafəsi 170 kilometrdən 150 kilometrə endirilib.
Raketlər yarımaktiv radar tuşlama sisteminə malikdir. Xəbər verilir ki, bu raketlərdən ballistik və qitələrarası raketlərin, təyyarə və helikopterlərin vurulması üçün istifadə oluna bilər.
Bəzi məlumatlara görə, bu raketlər eyni zamanda altı hədəfi nişan ala bilir.
Eyni xəbəri yayan Defense News saytı yazır ki, Çin hərbi yükü Xalq Azadlıq Ordusunun Y-20 ağır yük təyyarələri ilə iki gün ərzində çatdırıb.
Qeyd olunur ki, iki gün ərzində altı Y-20 təyyarəsi Bakıda və İstanbulda yolüstü eniş edib. Bu xəbəri rəsmi Bakı, hələlik, nə təsdiq, nə də təkzib edib. Təyyarələrin habelə Mərkəzi Asiya, Ermənistan və Bolqarıstanın üzərindən uçduğu bildirilir.
Xəbər verilir ki, Y-20 təyyarələrinin Çindən Serbiyaya uçuşlarını təyyarə marşrutlarını izləyən saytlar monitorinq ediblər.
