Danimarka Müdafiə Nazirliyindən verilən yazılı açıqlamada, Danimarka Xarici Kəşfiyyat Xidmətinin Kibertəhlükəsizlik Mərkəzi TikTok tətbiqinin “cihazda müəyyən hüquqlar və istifadəçi məlumatlarına giriş tələb etdiyini” ifadə edərək, casusluq şübhələrinin olduğunu bildirib.
Açıqlamada “tətbiqin rəsmi bölmələrdə istifadəsi qadağan ediləcək” və “tətbiqin bizneslə heç bir əlaqəsi olmadığı və Nazirlik daxilində ciddi təhlükəsizlik narahatlığına səbəb olduğu” bildirilib.
İşçilərdən rəsmi xidmətdə istifadə edilən telefonlara TikTok quraşdırmaması və quraşdırılanların silinməsi tələb edilən açıqlamada, heyətdən neçə nəfərin tətbiqdən istifadə edib-etmədiyi göstərilməyib.
Danimarka Parlamenti qanunvericilərə və işçilərə kibertəhlükəsizliklə əlaqədar olaraq fevralın 28-də TikTok-dan istifadə etməmələri barədə xəbərdarlıq edib.
Bəzi Danimarkalı siyasətçilər də kibertəhlükəsizlik tədbirləri çərçivəsində TikTok tətbiqini rəsmi telefonlarından sildiklərini açıqladılar.
TikTok, Çin tərəfdarı fikirləri yaymaq və istifadəçi məlumatlarına daxil olmaq üçün istifadə oluna biləcəyi təhlükəsizlik və məxfilik narahatlığına görə ciddi məhdudiyyətlərlə üzləşir.
Avropa İttifaqının (Aİ) icra orqanı olan Aİ Komissiyası təhlükəsizlik səbəbilə fevralın 23-də işçilərinə TikTok qadağası qoyub.
Norveçdə ədliyyə naziri hökumət tərəfindən ayrılmış telefonuna TikTok proqramını quraşdırdığı barədə məlumat vermədiyi üçün üzr istəməli olub.
ABŞ Senatı 2022-ci il dekabrın 15-də “milli təhlükəsizlik narahatlıqları” səbəbindən federal hökumət işçilərinə TikTok-u dövlətə məxsus cihazlara yükləməyi qadağan edən qanun layihəsini yekdilliklə qəbul edib.
28 dekabr 2022-ci ildə ABŞ Nümayəndələr Palatası TikTok tətbiqinin yüklənməsini və üzvlərinin və əməkdaşlarının istifadə etdiyi rəsmi cihazlarda istifadəsini qadağan edib. Merilend, Nebraska, Cənubi Karolina, Cənubi Dakota, İndiana və Texas da daxil olmaqla ABŞ-ın bütün 50 ştatı TikTok-un rəsmi telefonlarda istifadəsini qadağan edən oxşar qanunları qəbul edib. (AA)
Tərcümə“24 SAAT”
