Dövlət şirkətlərinin rəhbrələri təşviş içində – Həbslər ola bilər
Azərbaycanda dövlət şirkətlərinin fəaliyyətinin araşdırılmasına başlanılıb. İddialara görə, ölkə başçısı İlham Əliyevin keçirdiyi mətbuat konfrasında dövlət şirkətlərini sərt tənqid etməsi də bununla əlaqədardır. İlham Əliyev dövlət şirkətlərində idarəetmə sisteminin müasir tələblərə cavab vermədiyini bildirməklə yanaşı deyib:
“Bu idarəetmə sistemi büdcədən pulların “sağılması” məqsədilə istifadə olunur. Həmişə büdcədən dotasiyalara ehtiyac olur. Belə davam edə bilməz. Digər tərəfdən hazırkı vəziyyəti, həmçinin, Qarabağın da bərpasını nəzərə alsaq, strateji infrastruktur dövlətin əlində qalmalıdır. Bu, birmənalıdır. Əks halda biz ərazini bərpa edə bilməyəcəyik. Bu mərhələdə məqsədimiz dövlət şirkətlərinin korporativ idarəetməsini beynəlxalq normalara çatdırmaqdır. Lazım olan nəzarəti təmin etməkdir”.
Ölkə başçısı İlham Əliyevin nitqindən xüsusi çıxarış
Əliyevin daha çox dövlət şirkətlərinə ayrılan büdcə vəsaitlərinə diqqət çəkməsi araşdırmaların anti-korrupsiya mübarizəsi çərçivəsində apardıldığını deməyə əsas verir. 2019-cu ildən Azərbaycanda korrupsiyaya qarşı daha ciddi mübarizə başlayıb. Əgər əvvəllər korrurpisyaya görə həbs edilənlər əsasən xırda məmurlar idisə, indi cəmiyyət icra başçıları, nazir müavini səviyyəsində həbslərin şahidi olur.
Görünür, indi dövlət şirkətlərinin rəhbərləri ilə hesablaşmaq zamanı çatıb. Azərbaycanda iri dövlət şirkətləri sırasında SOCAR, “Azərsu” ASC, “Azərbaycan Dəmir Yolları” QSC, “Azərbaycan Hava Yolları”(AZAL) QSC, “Meliorasiya və Su Təsərrüfatı” ASC-nin adını çəkmək olar. Adıçəkilən dövlət şirkətlərinin başında duranların oliqarx məmurlar kateqoriyasına aid olduğunu söyləməyə ehtiyac yoxdur. Onların oliqarxa çevrilməsi bu qurumlarda korrupsiyanın olması faktını təsdiq edir.
Elə bu yaxınlarda blogger Mehman Hüseynov “Azərsu” ASC-nin sədri Qorxmaz Hüseynovun 100 milyonluq villasını üzə çıxarımışdı.
“Azərbaycan Dəmir Yolları” QSC-nin sədri Cavid Qurbanovun sərvəti barədə isə mediada çoxsaylı materiallar tirajlanıb.
SOCAR prezidenti Rövnəq Abdullayevin oğlunun 2 milyonluq saatı da yaddaşlardan silinməyib.
“AZAL” prezidenti Cahangir Əsgərov, “Meliorasiya və Su Təsərrüfatı” ASC-nin sədri Əhməd Əhmədzadənin topdağıtmaz əmlakı və biznes strukturları barədə də çox yazılıb.
Bu məmurlar həm də Prezident səviyyəsində tənqid atəşinə tutulub. Yəqin ki, İlham Əliyevin su təsərrüfatının vəziyyətinə dair müşavirə hər kəsin yadındadır.
Həmin müşavirədə ölkə başçısı açıq şəkildə Qorxmaz Hüseynovla Əhməd Əhmədzadənin fəaliyyətini tənqid etdi.
Cahangir Əsgərov isə Şuşada aeropot inşa etmək niyyətində düşdüyünə görə Prezidentin qəzəbinə tuş gəlmişdi.
Rövnəq Abdullayevə gəlincə, İqtisadiyyat naziri Mikayıl Cabbarovun SOCAR-ın Müşahidə Şurasının sədri təyin olunması artıq şirkətin rəhbərliyinə etimadın qalmadığını göstərir.
Mülahizələrə görə, araşdırmalara müvafiq olaraq adıçəkilən məmurlar barədə qərar veriləcək. Prosesin həbslərlə müşayiət olunacağı istisna deyil. Bu baxımdan, dövlət şirkətlərinin rəhbrələrinin hazırda təşviş içində olduğu söylənilir.