Loading...
Loading...
Gündəm

Fərman Ceyranlının saxlanıldığı bildirilir

Gürcüstandakı “Lanset” klinikasının təsisçilərindən olan Fərman Ceyranlının saxlandığı bildirilir. Dələduzluqda şübhəli sayıldığı deyilən F. Ceyranlı verilən məlumatlara görə, dünən mayın 22-də saxlanıb.

Gürcüstan hüquq mühafizə qurumlarından bunu “Turan” İnformasiya Agentliyinə təsdiqləyiblər.

Bildirilib ki, hələlik, ona rəsmi ittiham irəli sürülməyib.

Bir il əvvəl “Lanset” klinikasında həyata keçirilən transplantasiya əməliyyatlarında qanunsuzluğa yol verildiyi, klinikanın başqa rəsmiləri ilə birgə F. Ceyranlının da şübhəli qismində istintaq cəlb olunduğu söylənilir.

Hazırda onun Tbilisi Baş Polis İdarəsinin müvəqqəti saxlama təcridxanasında saxlandığı deyilir.

Fərman Ceyranlı əslən Gürcüstandandır. O, 1980-ci ildə Bakıda N. Nərimanov adına Azərbaycan Dövlət Tibb İnstitutunu bitirib.

Həmin vaxtdan 1 saylı Tbilisi şəhər klinik xəstəxanasında cərrahiyyə üzrə internatura keçib. 1982-ci ildən 1992-ci ilə qədər İ. M. Seçenov adına Moskva Tibb Akademiyasının cərrahi xəstəliklər kafedrasında əvvəlcə baş laborant, sonra isə elmi işçi və şöbə müdiri kimi fəaliyyət göstərib.

F. Ceyranlı sonradan fəaliyyətini Azərbaycanda davam etdirib. 1993-cü ildən Azərbaycan Səhiyyə Nazirliyində Elm İdarəsinin rəisi, 1994-cü ildə M. Topçubaşov adına Elmi Cərrahlıq Mərkəzinin direktor müavini, 1995-ci ildən isə həmin mərkəzin direktoru vəzifələrində çalışıb. Eyni zamanda Səhiyyə Nazirliyinin baş cərrahı olub.

O, bir neçə il əvvəl Gürcüstana gedərək “Lanset” klinikasının yaradıcılarından biri olub.

24saat.org

Mənbə – azadliq.org

Gözdən qaçırmayın:  Azərbaycanın Xarkovdakı konsulluğunun yaxınlığına raket düşüb

This site uses Akismet to reduce spam. Learn how your comment data is processed.

Back to top button