Gəncədə azana qadağa
“Şah Abbas Məscidinə toplaşmışdıq ki, bu gün zöhr azanının verilməməsinin səbəbini öyrənək. Polisləri göndəriblər ki, məscidə toplaşanları dağıtsın”.
Gəncə sakini Abbas Şərifov AzadlıqRadiosu-na bildirib ki, aprelin 19-da saat 13.00-da azan səsi eşidilməyincə məscidə toplaşıblar. İnanclı insanlar azanın verilməməsinin səbəbi ilə maraqlanıblar. Sakinlərin deməsinə görə, onlara bildirilib ki, göstəriş Gəncə şəhər icra hakimiyyətindən gəlib:
“Deyirlər, başçı belə göstəriş verib. Biz də narazılığımızı bildirdik. ‘Bir məscid başçının göstərişi ilə idarə olunmaz’, – dedik. Qərara aldıq ki, elə məsciddəcə saat 19.54 azanını gözləyək. Ancaq indi polislər tökülüşüb, adamları zorla məsciddən çıxarmağa çalışırlar”.
Gəncə Şəhər Polis Şöbəsindən AzadlıqRadiosu-na bildirilib ki, idarənin bir neçə əməkdaşı məscid ərazisində öz xidmətlərindədirlər və hər hansı qarşıdurma, narazılıq yoxdur.
AzadlıqRadiosu Şah Abbas Məscidindən və Gəncə Şəhər İcra Hakimiyyətindən məsələyə münasibət öyrənməyə çalışır.
2015-ci ilin oktyabrında Aşura mərasimi öncəsi həmin məsciddə dindarlarla polis arasında qarşıdurma yaranmışdı. Dindarlar məscidin bağlandığını deyirdilər.
24saat.org
Mənbə – azadliq.info