Həbsdəki satirik şair Tofiq Həsənlinin səhhətində problemlər yaranıb.

Bu barədə T.Həsənlinin vəkillərindən Elçin Sadıqov məlumat verib.

Saytların yığılması

Vəkil bu gün, mayın 18-də şairlə saxlandığı 6 saylı Cəzaçəkmə Müəssisəsində görüşüb.

“Əhvalı yaxşıdır, ancaq səhhətində ciddi problemlər var. Ürək nahiyəsində kəskin ağrılar hiss edir. Müəssisə rəhbərliyinə müraciətlər etsə də onun müayinə edilməsi ilə bağlı addımlar atılmır”, – vəkil bildirib.

Vəkil şairin müalicə olunmasına şərait yaradılmasından ötrü Ədliyyə Nazirliyinin Penitensiar Xidmətinin rəhbərliyinə müraciət edəcəyini bildirib.

Vəkilin açıqlamasına, hələlik, Penitensiar Xidmətdən münasibət almaq mümkün olmayıb.

XATIRLATMA

Tofiq Həsənli 2016-cı il avqustun 22-də qanunsuz narkotik dövriyyəsi ittihamı ilə 6 il müddətinə azadlıqdan məhrum edilib. Onun apellyasiya şikayəti də təmin olunmayıb.

T.Həsənli KİV-də hakimiyyətin və dövlət məmurlarının ünvanına tənqidi pamfletləri ilə tanınır.

2005-ci ildə də o, narkotikə görə üç il azadlıqdan məhrum edilib. Amma 2007-ci ildə amnistiya ilə azadlığa buraxılıb.

T.Həsənli Facebook və Youtube hesablarında satiralarını yaymağa davam edib. 2015-ci ilin yanvarında o, həbslə hədələndiyini bildirib, oktyabrda isə saxlanıb. Buna qədər onun xaricdən yayımlanan «Azərbaycan saatı» proqramında tənqidi şerləri oxunurdu.