iPhone SE (2022) Geekbench testlərindən keçib
Apple şirkətinin yeni iPhone SE (2022) smartfonu A15 Bionic prosessoru ilə təchiz olunur. Qeyd etmək lazımdır ki, iPhone 13 seriyasının modelləri də sözügedən prosessora sahibdirlər. Hələ satışa çıxmamışdan öncə iPhone SE (2022) modeli Geekbench bençmark testlərindən keçib. Test nəticələrinə əsasən məlum olub ki, iPhone 13 modelləri kimi A15 Bionic prosessoruna sahib olmasına baxmayaraq iPhone SE (2022)-nin performans göstəriciləri bir qədər fərqlənirlər.
Beləliklə 4 GB RAM-a sahib iPhone SE (2022) Geekbench-in birnüvəli testində 1695 xal, çoxnüvəli testində isə 4021 xal toplayıb. Bu göstəricilər iPhone 13 mini-nin göstəricilərindən bir qədər yüksək olsalar da, standart iPhone 13-ün göstəricilərindən aşağıdırlar. Heç istisna deyil ki, Apple şirkəti bu cür addımı smartfonda olan kiçik həcmli batareya səbəbilə atıb. Qeyd etmək lazımdır ki, bəzi texniki özəlliklər xaric iPhone SE (2022) modeli dizayn baxımından iPhone SE (2020) ilə eynidir. iPhone SE (2022) 18 mart tarixində 429$ qiymətində satışa çıxacaq.
