İtaliyanın Baş naziri Aİ ölkələrinin Ukraynaya münasibətini açıqladı
“İtaliyadan başqa əsas dövlətlər Ukraynaya namizəd statusunun verilməsinə qarşıdır”
İtaliyanın Baş naziri Mario Draqi bildirib ki, İtaliyadan başqa Avropa İttifaqının (Aİ) əsas dövlətləri iyunda Ukraynaya namizəd statusunun verilməsinə qarşıdır.
Bu barədə Baş nazir Brüsseldə keçirilən sammitin yekunlarına dair mətbuat konfransında danışıb.
Draqi qeyd edib ki, hazırda Ukraynaya namizəd statusunun verilməsi ilə bağlı vəziyyət gözlənilməzdir.
Eyni zamanda, o bildirib ki, Avropa Komissiyası Ukraynanın sürətləndirilmiş üzvlük prosesinə ehtiyacı olması ilə razılaşır.
Slovakiya Prezidenti Zuzana Çaputova mayın 31-də Kiyevdə keçirdiyi brifinqdə bildirib ki, o, polşalı həmkarı Anjey Dudanı Ukraynanın namizəd statusu ilə bağlı “daha təmkinli” olan Aİ liderləri ilə danışıqlara dəvət edib.
Prezident Volodimir Zelenski isə əlavə edib ki, bəzi dost ölkələr hələ də Ukraynanın AB-yə sürətli üzvlüyünə bir qədər şübhə ilə yanaşır: “Ancaq prinsipcə, demək olar ki, hamı müsbət mövqe sərgiləyir”.
Fevralın 28-də Ukrayna Prezidenti V.Zelenski Ukraynanın Aİ-yə daxil olması üçün ərizəni imzalayıb.
O bildirib ki, Rusiyanın işğal savaşından sonra Ukrayna yeni xüsusi prosedura əsasən dərhal daxil olmaq məsələsi ilə bağlı Avropa İttifaqına müraciət edəcək.
Martın 21-də Avropa Komissiyası Ukraynanın üzvlüyü ilə bağlı nəticə üzərində işə başlayıb.
V.Zelenskinin sözlərinə görə, Avropa Komissiyasının rəyi bir neçə aya hazırlanacaq.
