Loading...
Loading...
Cəmiyyət

Jurnalist Əvəz Zeynallının həbsi tələb olunub

Azərbaycan Milli Elmlər Akademiyasının (AMEA) Hüquq şöbəsinin müdiri Kamal Əliyev “Xural TV” onlayn kanalının rəhbəri Əvəz Zeynallının həbsini tələb edir. Əliyev bu tələblə xüsusi ittiham qaydasında məhkəmədə iddia qaldırıb. Martın 3-də Bakı Apellyasiya Məhkəməsində onun şikayətinə baxılıb.

Şöbə müdiri iddia edir ki, Zeynallı onu ağır cinayətdə günahlandırmaqla böhtan atıb. Söhbət Əliyevin 2017-ci ildə baş vermiş “Tərtər hadisələri” (bir çox hərbçilərə işgəncə verilməsi, onlardan bir hissəsinin öldürülməsi və s.) ilə əlaqədə ittiham olunmasından gedir. Ona görə də “Xural TV” rəhbərinin CM-in 147.2 (ağır cinayətdə ittiham etməklə böhtan atma) maddəsi ilə cəzalandırılmasını tələb edir.

“Jurnalist olaraq, aydınlaşdırmağa çalışmışam”

Zeynallı isə onun iddiasının əsassız olduğunu deyir. Baş redaktor bildirib ki, AMEA Hüquq və İnsan Haqları İnstitutunun böyük elmi işçisi Esmira Orucova “Xural TV”də qonaq olarkən ona Kamal Əliyev haqda sual ünvanlayıb: “Soruşdum ki, Kamal Əliyevin adı “Tərtər hadisələri”ndə hallanır, bu barədə nə deyə bilərsiz? Esmira xanım da cavab verdi ki, “bu haqda heç bir məlumatım yoxdur”. Vəssalam. Buna görə mənə qarşı xüsusi ittiham qaydasında iddia qaldırıb. Həqiqətən də, mətbuatda onun adı hallanıb, mən də jurnalist olaraq, aydınlaşdırmağa çalışmışam. Bunun qədər normal olan nə var ki?!”.

Əliyevin jurnalistə qarşı iddiasını Binəqədi Rayon Məhkəməsi icraata götürüb baxmaqdan imtina edib. O, həmin qərardan apellyasiya şikayəti verib.

Keçmiş deputatın həbsini tələb edirdi

AMEA-nın Hüquq şöbəsinin müdiri keçmiş deputat Elton Məmmədova qarşı da məhkəmədə bənzər iddia qaldırmışdı. Onun da həbsini tələb edirdi.

Kamal Əliyev iddia ərizəsində göstərmişdi ki, Elton Məmmədov onu “cinayətkar” adlandırıb, onu 2017-ci ildə “Tərtər hadisələri” ilə bağlı ədalətsiz hökmlər çıxarmaqda ittiham edib.

Əliyev əvvəllər hərbi məhkəmənin hakimi olub.

Lakin Səbail Rayon Məhkəməsi həmin iddianı icraata götürmədi. (Azadlıq Radiosu)

24 saat” “Jurnalist Əvəz Zeynallının həbsi tələb olunub” başlıqlı yazını “Pressklub”a istinadən dərc edib

Xeberler

Gözdən qaçırmayın:  Bakıda beş nəfər intihara cəhd edib

This site uses Akismet to reduce spam. Learn how your comment data is processed.

Back to top button