Kadyrov geylərlə bağlı komissiya ilə əməkdaşlıq edəcəyini deyir
Çeçenistan rəhbəri Ramzan Kadyrov mayın 5-də deyib ki, bu muxtar respublikada geylərin təqibi iddialarını araşdıran Kreml rəsmiləriylə əməkdaşlıq edəcək.
Rusiya prezidenti Vladimir Putin daha öncə demişdi ki, “baş prokuror və daxili işlər naziriylə” şəxsən danışacaq, onlardan Kremlin insan haqları ombudsmanı Tatyana Moskalkova-ya məlumatların yoxlanmasında kömək göstərmələrini istəyəcək.
Homoseksualların saxlanması, işgəncəyə məruz qalması xəbərləri beynəlxalq ictimaiyyətin tənqidinə səbəb olub.
“Çeçenistan bu mövzudan danışan qərb siyasətçilərinə, eləcə də Almaniya kansleri Angela Merkel-ə göstərəcək ki, bütün bəyanatları əsassızdır”, – Kadyrov Rusiya mediasına deyib.
O, istintaqla əməkdaşlıq edəcəyini söyləsə də, “Qərbin bu mövzunu şişirtdiyini” sözlərinə əlavə edib. Kadyrov bir daha Çeçenistanda geylərin olmadığını vurğulayıb. O, daha öncə də oxşar açıqlama vermişdi.
24saat.org
Mənbə – azadliq.org