ÖLKƏ BAŞÇISINA ŞİKAYƏT – YENƏ KAMAL ABDULLA…
Azərbaycan Dillər Universitetinin (ADU) daha bir əməkdaşı – Mehparə Manafova Kamal Abdulladan şikayət etdi.
ADU əməkdaşı Mehparə Manafova universitetdə baş verən qanunsuzluqlarla bağlı ölkə başçısı İlham Əliyevə və Birinci Vitse-prezident Mehriban Əliyevaya müraciət edib.
O bildirib ki, 2017-ci ildən Kamal Abdullanın universitet rektoru vəzifəsini icra etməsiylə ali təhsil müəssisədə özbaşınalıq, korrupsiya, hədə-qorxu kimi hallar baş alıb gedir: “Mən, 1994-cü ildə martın 19-da Azərbaycan Dillər Universitetinin 2-ci kurs tələbəsi ikən metroda partlayış zamanı sol qolumu itirdim, sağ qolumdan ciddi sınıqlar və ciddi yanıqlar alaraq 1-ci qrup əlil oldum. 1997-ci ildə universiteti bitirdim və həmin ildən orada işləyirəm. İllərcə sevgi, xoş rəftar gördüm. Çox təəssüflər olsun ki, Kamal Abdulla və onun özü ilə gətirdiyi ətrafı gələnə kimi.
Universitetdə atamanlıq edənlər, hədə-qorxu gələnlər nə böyük, nə də kiçik sayırlar. Haqqı dediyin zaman işdən qovulmaqla hədələnirik”.
Mehparə Manafova şikayət ərizəsində daha sonra bildirir ki, rəhbər vəzifəlilərlə yanaşı, digər ADU əməkdaşları da mövcud ənənəni davam etdirir: “Maliyyə şöbəsinin müdiri Nüşabə Tanrıverdiyeva universitetə gəldiyi gündən mənimlə düşməncilik edir, gördüyüm nöqsanları dilə gətirdiyim üçün məni qara siyahıya salıb. Universitetdə maddi vəsaitlər talanır, bu universitetdə hər kəsin gözü önündədir. Məzuniyyət pulunu ödəmək ücün büdcədə pulun olmadığı söyləntiləri var. Mən 27 ildir ki, o universitetdəyəm, bir dəfə müalicəyə getmək üçün pul istədim, başıma gətirmədikləri şər iftira qalmadı. Məni – iki qolumdan şikəst insanı Nüşabə Tanrıverdiyevanı universitetdə döyməkdə ittiham edib şərlədilər. Onlar öz cinayətkar əməllərini mənim kimi insanlara iftira atmaq üçün başqalarını şahid tutaraq tanımadığı insanın əleyhinə qol çəkdirərək ört-basdır edirlər”.
“Universitetdə çox qanunsuzluqlar baş verir, burada yazmaq istəmirəm. Universitetdə illərlə eyni vəzifəni daşıyan insanlar var ki, məsələn, Məsmə Qazıyeva kimi. Tələbəlik dövründən tanıyıram. Dövlət imtahanımıza nə qədər pullar yığdığını mən bilirəm. Bu gün həmin xanım bütün universitet işçilərinin taleyini həll edən sənədlərə şəxsi marağı üçün qol cəkdirir. Mənə “sən şəhid deyilsən ki” deyən xanımın qızı prorektor oldu. Xahiş edirəm ki, Azərbaycan Dillər Universitetində olanlara reaksiya verin, ölçü götürün”, – şikayətçi bildirib.
Xatırladaq ki, universitetin sabiq dekanı Vüsalə Ağabəyli, müəllimi Pərvin Mürsəlova, kadrlar şöbəsinin baş mütəxəssisi Elmira Baxşəliyeva hüquqlarını pozduqlarına iddiası ilə ADU-nun rektoru Kamal Abdullanı məhkəməyə verib.
Kamal Abdulla isə öz növbəsində adı çəkilən əməkdaşları və “Xural” qəzetinin baş redaktoru Əvəz Zeynallını məhkəməyə verib.
