Kimya üzrə “Nobel” mükafatı laureatları açıqlanıb
Yayımlandı: 5 Oktyabr 2022 15:58
Onlar “klik kimyası və bioortoqonal kimyanın inkişafına görə” görə mükafatlandırılıblar
2022-ci il “Nobel həftəsi” çərçivəsində kimya üzrə mükafatın laureatları açıqlanıb.
İsveç Kral Elmlər Akademiyası 2022-ci il kimya üzrə “Nobel” mükafatını “klik kimyası və bioortoqonal kimyanın inkişafına görə” Karolin Bertozzi (ABŞ), Morten Meldal (Danimarka) və Barri Şarplessə (ABŞ) vermək qərarına gəlib.
Oktyabrın 6-da ədəbiyyat, oktyabrın 7-də sülh və oktyabrın 10-da iqtisadiyyat üzrə “Nobel” mükafatlarının laureatları açıqlanacaq.
2022-ci ilin ilk “Nobel” mükafatı laureatı “Fiziologiya və ya tibb” nominasiyası üzrə mütəxəssis – isveçli bioloq Svante Paabo ilk qalib olub.
Fizika üzrə mükafatın laureatları isə fransalı fizik Alen Aspekt, amerikalı fizik Con Frensiz Klozer və avstriyalı fizik Anton Tsaylinger olub.
“Nobel həftəsi” oktyabrın 3-dən 10-dək keçiriləcək.
Mükafatlar ənənəvi olaraq dekabrın 10-da, Alfred Nobelin anım günündə sahiblərinə təqdim olunacaq.
