Körpü banklar vasitəsilə birləşməyə gediləcək
Samir Əliyev: “Əsas üstünlük bankların konsolidasiyasına veriləcək”
Ölkə banklarında mövcud böhran durumu davam edir. Bir müddətdir bank sektorunda başlayan konsolidasiya prosesinin hələ davam edəcəyi də söylənir. Ötən günlərdə iki bank – “AtaBank” və “CDB Bank” birləşib. Banklar Assosiasiyasının prezidenti Zakir Nuriyev qarşıdakı dövrdə digər bankların da birləşəcəyini deyib.
İqtisadçı-ekspert Samir Əliyev Azadlıq-info-ya açıqlamasında deyir ki, Mərkəzi Bankın son illər nəticəsiz olan konsolidasiya cəhdləri nəhayət ki reallaşıb. Ekspert “Atabank” və “Caspian Development Bank”ın birləşmək qərarını “AGbank”, “Parabank” və diər bankların 2015-ci ildəki uğursuz təşəbbüslərindən sonra ilk real addım adlandırır:
“Azərbaycanda bankların konsolidasiyası çətin prosesdir. Bu məsələ son vaxtlar hətta qeyri-mümkün olub. Deyərdim ki, bunun bir neçə səbəbi var. Bank sahiblərinin məsuliyyəti və səlahiyyəti başqasıyla bölüşmək istəməsi ilkin səbəblər arasındadır”.
Ekspert deyir ki, ölkədəki bəzi bankların müxtəlif sahibi var. Onların birləşməsi mümkün olmasa da, eyni sahibi olan bankların birləşməsi realdır. Birləşmədən sonra isə onların sayı 31 qalacaq. Beləliklə də devalvasiyadan sonra bağlanan bankların sayı 14 olacaq:
“Bank qanunvericiliyinə edilən son dəyişiklikdən sonra bankların sayının azaldılması prosesi davam edəcək. Əsas üstünlük də bankların konsolidasiyasına veriləcək. Bu məsələ baş tutmasa, banklar ləğv ediləcək. Son dəyişikliklər rezolyusiya tədbirləri vasitəsilə bankları konsolidasiyaya “stimullaşdıracaq”. Körpü bankların yaradılması vasitəsiylə bəzi bankların əvvəlcə sağlamlaşdırılması, sonra isə digər banklara birləşdirilməsi tədbirləri həyata keçiriləcək. Bütün proseslərin nəticəsi olaraq bankların sayının 25-ə qədər azaldılmasını gözləmək olar”.
Nigar
24saat.org
Mənbə – azadliq.info