Malayziya təyyarəsinin Rusiyadan göndərilən silahla vurulması sübut olundu

05/06/2017

2014-cü ildə Donbasda Boeing-in vurulmasında Rusiyanın əlini olması ilə bağlı hesabat açıqlayan Beynəlxalq jurnalist-ekspert qrupu Bellingcat təyyarənin vurulduğu “Buk” qurğusunun Rusiyaya məxsus olduğunu sübut edib.
Ekspertlər ZRK-nin Rusiyanın 53-cü zenit-raket briqadasına məxsus olduğunu sübut edən yeni foto tapıb.
“Buk”un Rusiyaya məxsus olması ilə bağlı hesabat iyunun 5-də dərc edilib. Eskpertlər ZRK-nin Ukraynaya göndərilmədən əvvəl çəkilən şəklinə istinad edib. Şəkil 2013-cü ildə çəkilib, lakin 2015-ci ilin fevral ayında ilk dəfə sosil şəbəkələrdə yayılıb.
Şəkil rusiyalı mexanikin albomundan götürülüb. Boeing-in məhz bu “Buk-332” ilə vurulmasını isə onun üzərində olduğu maşının nömrəsi təsdiq edir.
Bundan əlavə, hesabat müəllifləri müəyyən ediblər ki, “Buk”un şəkli Kursk yaxınlığında 53 saylı zenit-raket briqadasının parkında çəkilib.
Bunu şəkildə əks olunan mexanik də təsdiq edib. O bildirib ki, 2013-cü, bəlkə də 2014-cü ildə Kurskda qurğunu təmir edib.
Bundan əvvəl də Bellingcat ekspertləri sübut etmişdi ki, “Buk”un Donbassa aparılmasına görə rusiyalı zabir Sergey Dubinski cavabdeh olub. Mütəxəssislər Ukrayna Təhlükəsizlik Xidmətinin tutduğu danışıqlara əsaslanıb.