Marsa 45 gün ərzində çatmaq?: Alimlər kosmik gəmilər üçün lazerlərdən istifadə etməyi təklif ediblər
Mars planetinin kolonizasiyası qarşısında duran əsas problemlərdən biri ora insanların hansı üsul ilə sürətlə çatdırılmasından ibarətdir. Yaxın gələcəkdə bu problemi həll etmək lazımdır. Mütəxəssislər bu problemin həll yolunun axtarılması ilə məşğul olublar və bunun yolunda qeyri-adi ideyanı təklif ediblər. Belə ki, mütəxəssislər kosmik gəmilərin Marsa 45 gün ərzində çatmaları üçün Yer kürəsinin səthində quraşdırılmış lazerdən istifadə etməyi təklif ediblər. Qeyd etmək lazımdır ki, hal hazırda Marsa çatmaq üçün minimum 115 gün vaxt lazımdır. Kanadanın MakQil Universitetinin alimləri Yer kürəsinin səthinə 10 metrlik lazer qəfəsini yerləşdirməyi təklif ediblər. Həmin lazer qəfəsi öz növbəsində kosmik gəmini enerji ilə qidalandırmalıdır. Alimlərin təklif etmiş olduqları ideyaya əsasən lazer kosmik gəmidəki hidrogen plazmasını qızdıracaq.
Bu proses Marsa uçuş üçün nəzərdə tutulmuş qaz formalı hidrogenin əldə edilməsinə kimi davam edəcək. Bu üsul kosmosa ağır yanacaq baklarının daşınmasına ehtiyac duymadan planetlərarası itələmə qüvvəsini təmin edə bilər. “Lazer-istilik mühərriki voleybol meydançası ölçüsündə olan lazer qəfəsi sayəsində tonlarla faydalı yükü təyinat nöqtəsinə sürətlə çatdıra bilər” – deyə alimlər qeyd ediblər. NASA bu məsələ ilə bağlı müsabiqə elan edəndən sonra alimlər bu layihə ilə məşğul olmağa başlayıblar. Müsabiqə çərçivəsində mühəndislər tonlarla faydalı yükü Marsa 45 gün ərzində çatdıra biləcək üsulların yaradılması ilə məşğul olmalıdırlar.
Təklif edilmiş bu layihə faydalı yük ilə astronavtları Marsa kimyəvi yanacaq əsaslı raketlərdən daha tez çatdıra biləcək. Mars planetinin orbitinə çatandan sonra isə lazer-istilik mühərriklərinə sahib kosmik gəmi tormozlanma prosesi üçün planetin atmosferindən istifadə edəcək. Qeyd etmək lazımdır ki, kosmik tormozlanma çox qəliz və təhlükəli prosesdir. O, kosmik gəminin sürətinin azaldılması üçün nəzərdə tutulub. Ənənəvi kosmik gəmilər tormozlanma prosesi üçün kiməyi yanacaq növlərindən istifadə edirlər. Kimyəvi yanacaq növləri isə kosmik gəminin böyük hissəsini tuturlar. Tormozlanma üçün Mars atmosferinin istifadəsi öz növbəsində Yer kürəsində çoxlu miqdarda yanacağın saxlanmasına imkan verəcək.
