24saat.org Milan Prokurorluğu Luca Volonte ilə Azərbaycanın maliyyə əlaqələrini araşdırır - 24 saat

AZ24SAAT.ORG

Now Reading:
Milan Prokurorluğu Luca Volonte ilə Azərbaycanın maliyyə əlaqələrini araşdırır

Prokurorluq 4 Britaniya qeydiyyatlı şirkətə aid hesabların arxasında duran şəxsləri axtarır

Milan prokurorluğu Danimarka hakimiyyət orqanlarından mənşəyi Azərbaycan olan vəsaitlərə aid məlumatları istəyib. İtaliyada çıxan “Il Sole 24 Ore” qəzeti belə yazır. Məlumatda o da bildirilir ki, Milan şəhərinin prokurorluğu Danimarkanın “Danske Bank”-ının araşdırılmasına başlayıb.
Beləliklə, İtaliya Avropanın ən iri maliyyə təsisatlarından olan bu bankın fəaliyyətinin araşdırıldığı ölkələrin sırasına qoşulub.

“Danske Bank”-ın dünya mediasında tarixin ən böyük çirkli pul yuyulması qalmaqalı adlandırılan bəzi fəaliyyətləri indiyədək Danimarkada, Estoniyada, Birləşmiş Krallıqda və ABŞ-da təhqiq olunur.

Qəzet yazır ki, Milan prokurorunun müavinləri Adriano Scudieri və Elio Ramondini “Danske Bank”-ın Tallin filialında açılmış 4 Britaniya qeydiyyatlı şirkətə aid hesabların arxasında duran şəxslərin aşkara çıxarılmasına çalışırlar.

Məqalədə deyilir ki, bu təhqiqat İtaliya siyasətçisi Luca Volonteyə qarşı ittihamla nəticələnmiş başqa bir istintaqla paralel aparılır. Volonte ofşor şirkətlər və bank hesabları vasitəsilə mənşəyi Azərbaycan olan iri məbləğləri almaqda ittiham olunur.

Volonteyə qarşı çirkli pulların yuyulması ittihamı üzrə işə xitam verilib. Lakin prokurorlar bu məhkəmə qərarından apelyasiya şikayəti veriblər.

İtaliya siyasətçisinin Avropa Şurası Parlament Assambleyasının üzvü olduğu vaxtlarda “Danske Bank” vasitəsilə pullar aldığı iddia edilir. O da iddia olunur ki, Volonte bu pulların müqabilində Avropa Şurasında Azərbaycana dəstək təşkil etməli idi.

Məqalədə deyilir ki, Azərbaycanın AŞPA-dakı imicini yaxşılaşdırmaq səylərinə dair iddialara aid təhqiqat yazılarının ardınca AŞPA-nın 13 üzvü Azərbaycan hökumətindən hədiyyələr və rüşvət aldığına görə qurumdan xaric edilib.

“Danske Bank”-ın Estoniya filialının keçmiş rəsmilərinə qarşı bu əməliyyatda iddia edilən iştiraklarına görə cinayət işi qaldırılıb. Bu bankda açılmış hesablar Azərbaycandan və ofşor şirkətlərdən milyardlarla dolların Estoniya filialı vasitəsilə sərbəst axınına imkan verirdi. Estoniya filialı vasitəsilə sözügedən vəsaitlər başqa ofşor şirkətlərə, Azərbaycan rejimini tərifləyən yüksək vəzifəli rəsmilərə və Avropa siyasətçilərinə ötürülürdü.

Hazırda Milan prokurorlarının araşdırdıqları şirkətlərin bir neçə bank və şirkətlərin mürəkkəb şəbəkəsi vasitəsilə 3 milyard dollar qəbul etdiyi iddia olunur. Bu bankların arasında Latviyanın ABLV bankının da olduğu bildirilir.

ABLV bankının habelə 17 Black şirkətinə pul tranşları edilməsində iştirakı iddia olunur. 17 Black şirkətinin Maltanın turizm naziri Konrad Mizzi-yə və baş nazir administrasiyasının rəhbəri Keith Schembri-yə aybaay haqq ödənməsi üçün açılmış iki şirkətdən biri olduğu iddia edilir.

“Il Sole 24 Ore” qəzeti hüquqi sənədlərə əsasən yazır ki, Milan prokurorlarının təhqiqatı altında olan 5 şirkət 5 ölkədəki banklar vasitəsilə 24 şirkətdən 3 milyard dollar pul qəbul ediblər. Bu ölkələr Azərbaycan, Estoniya, Latviya, Hollandiya və Lüksemburqdur.

Qəzet yazır ki, şübhəli pullar “Danske Bank”, “Ablv Bank” və “Baltikums Bank”dan keçib. Bundan sonra Çindən Dubaya, Almaniyadan ABŞ-a və İtaliyayadək müxtəlif ölkələrin 36 bankındakı hesablardan 94 şirkətə axıb.

Məqalədə qeyd edilir ki, sözügedən bankların bu pulların təbiətindən xəbərdar olduqlarını sübutsuz söyləmək mümkün deyil.

Bu da qeyd olunur ki, “Danske Bank”-a qarşı Danimarka məhkəməsi tərəfindən ittiham irəli sürülüb və dekabrın 19-da Estoniyada ilk həbslər həyata keçirilib.

Qəzetin yazdığına görə, Danimarka bankının Estoniya filialının 10 keçmiş rəsmisi spesifik olaraq Azərbaycandan, qismən də Gürcüstandan gələn pullarla bağlı həbs edilib. Estoniya hakimiyyət orqanları həbslərin davam edəcəyini bildirib.

“Danske Bank” ötən ilin sentyabrında bildirmişdi ki, Tallindəki kiçik filialdan keçən nəhəng pullarla bağlı bankın şübhə doğuran 42 keçmiş əməkdaşı barədə məlumatı hüquq-mühafizə orqanlarına təqdim edib.

Qəzet yazır ki, həbs olunanların hamısı Estoniya vətəndaşlarıdır və “Hermitage Capital” şirkətinin təsisçisi və sahibi Bill Browderin hakimiyyət orqanlarına verdiyi 26 nəfərlik siyahıda olanlardır.

“IlSole 24 Ore” yazır ki, “The Danske Bank” Danimarka, Estoniya, Britaniya və ABŞ-da araşdırılsa da, əslində bu bankla bağlı ilk təhqiqatlar bir neçə il əvvəl İtaliyada başlanıb.

Söhbət Luca Volonte, habelə Avropa Şurasının bir sıra başqa üzvlərinin Azərbaycanla iddia edilən maliyyə əlaqələrinin Milan prokurorluğu tərəfindən araşdırılmasından gedir.

Azərbaycan tərəf indiyədək ölkədən böyük məbləğdə vəsaitin çıxarılaraq xaricdə lobbiçiliyə xərclənməsi iddialarını təkzib edib. Deyilənləri ölkəni istəməyən xarici “qara qüvvələrin şantaj kampaniyası” adlandırıb.

24saat.org yazını Meydan TV-yə istinadən təqdim edir

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

24saat.org@gmail.com
Çəkdiyiniz videoları bu ünvana yollamaqla bizimlə əməkdaşlıq edə bilərsiniz! Telefon - 055 239-48-36
[mc4wp_form id=""]
Input your search keywords and press Enter.