Minsk Belarus ərazisinə düşən raketə görə Kiyevə nota verib
Belarus ölkənin qərbindəki Brest şəhəri yaxınlığına Ukrayna hava hücumundan müdafiə sistemi raketinin düşməsi ilə bağlı dekabrın 29-da Ukrayna səfirini Xarici İşlrə Nazirliyinə çağıraraq etiraz notası təqdim edib.
Belarus XİN-in məlumatında deyilir ki, “Ukrayna ərazisindən antitəyyarə S-300 idarə olunan raketinin atılması ilə bağlı sərt etiraz bildirllib” və “bu hadisə ilə bağlı səhih təhqiqat aparılması və cavabdehlərin cəzalandırılması tələb olunub”.
Bu hadisə nəticəsində itki olmadığı bildirilir. Dekabrın 29-da özü Rusiyanın ağır raket hücumuna məruz qalan Ukrayna bu hadisə ilə bağlı şərh verməmişdi.
Rusiya raketlərinin əksəriyyəti Ukrayna hava hücumundan müdafiə qüvvələri tərəfindən vurulub.
Bundan əvvəl Belarusunun Müdafiə Nazirliyi bildirmişdi ki, ölkənin hava hücumundan müdafiə sistemi Ukraynadan atılan S-300 raketini Brest sərhəd rayonunda vurub.
Müdafiə Nazirliyinin bəyanatında bildirilir ki, ilkin təhqiqat qırıntıların Ukraynadan atılmış S-300 raketinə aid olduğunu təsdiqləyib.
İtki və dağıntı olmayıb
Xəbər verilir ki, Brest rayonunun sakinləri əvvəlcə partlayış səsi eşidiblər, daha sonra isə Harbaxa kəndi yaxınlığında raket qırıntıları aşkar olunub.
BelTa agentliyi xəbər verir ki, qırıntılara ən yaxın yaşayış binası 66 metr məsafədə yerləşir.
Agentlik bunu da bildirir ki, insident barədə Belarus başçısı Alyaksandr Lukaşenkaya dərhal məlumat verilib.
Belarus rəsmən Rusiyanın Ukraynaya müdaxiləsində iştirak etməsə də, Rusiya qoşunlarına bu müdaxilə üçün platsdarm verib.
Bundan əvvəl Belarus prezidentinin mətbuat xidmətinə bağlı teleqram-kanal Ukrayna raketinin təsadüfən istiqamətini dəyişməsi nəticəsində Belarus sərhədini keçməsini bildirmişdi.
