Müdafiə Nazirliyi sorğumuza cavab verdi – bütün müvafiq tədbirlər həyata keçirilir!
24saat.org saytında Ziya Bağırov adlı facebook istifadəçisinin yaydığı məlumat əsasında Zabitlərin ödənilməyən məzuniyyət pulu ilə bağlı problem sosial şəbəkələrə daşınmaqdadır başlıqlı yazı dərc olunub. Həmin yazıda Azərbaycan Silahlı Qüvvələrində xidmət edən zabitlərə çatası məzuniyyət pulunun son iki ildir ki, ödənilməməsi ilə bağlı iddialar yer almışdı. Yazı sayta yerləşdirilən günlərdə MN yolladığımız sorğuya cavab verməsə də, 13.12.2016-cı il tarixində saytımızın elektron poçtuna cavab məktubu daxil olub. 24saat.org olaraq həmin izahatı olduğu kimi təqdim edirik:
Bu məsələ ilə əlaqədar daxil olan sorğuların Müdafiə Nazirliyi tərəfindən dəfələrlə cavablandırılmasına baxmayaraq bir daha bildiririk ki, ehtiyata və istefaya buraxılmış hərbi qulluqçuların istifadə etmədikləri növbəti məzuniyyətə görə kompensasiyanın hesablanması və ödənilməsi üçün Müdafiə Nazirliyi tərəfindən onun səlahiyyətləri çərçivəsində bütün müvafiq tədbirlər həyata keçirilir.
Müdafiə Nazirliyi büdcə təşkilatı olduğundan, müvafiq maliyyə vəsaiti ayrıldıqdan sonra ehtiyata və istefaya buraxılmış hərbi qulluqçuların istifadə etmədikləri növbəti məzuniyyətə görə kompensasiyaların ödənişi nazirlik tərəfindən mərhələli şəkildə həyata keçirilir.
