Baş redaktor şahidlər dindirildikdən sonra ifadə verəcəyini deyir
Bakı Ağır Cinayətlər Məhkəməsində dövlət əleyhinə çağırışlarda ittiham olunan “bastainfo.com” saytının baş redaktoru Mustafa Hacıbəylinin işi üzrə məhkəmə prosesi davam etdirilib.
Yanvarın 29-da hakim Səbuhi Hüseynovun sədrliyilə keçirilən məhkəmə iclasında Tural Hacıbəyli şahid qismində dindirilib. O, Mustafa Hacıbəylinin qardaşı Vaqif Hacıbəylinin oğludur.
T.Hacıbəyli bildirib ki, saytın rəsmi işçisi olmayıb. Texniki məsələlərlə əlaqədar kömək lazım olanda əmisi ona müraciət edib, o da problemi həll edib: “Mənim saytda gedən yazılardan xəbərim olmayıb”.
Hakim Səbuhi Hüseynov bildirib ki, digər şahidlər məhkəməyə gəlməyib.
Onlar əsas şahidlərdir – saytda gedən yazıların narahatlıq yaratması haqda ifadə verənlər. Bunlar 45 yaşlı İlahə Xalidova, 52 yaşlı Arzuxanım Məmmədova və 51 yaşlı Zülfiyyə Babayevadır.
Mustafa Hacıbəyli özünü təqsirli bilməyib. O bildirib ki, ittiham tamamilə əsassızdır. M.Hacıbəyli şahidlər dindirildikdən sonra ifadə verəcəyini bildirib.
Məhkəmə prosesi fevralın 5-də davam edəcək.
Gəncədə icra başçısının güllələnməsi və Mingəçevir Su Elektrik Stansiyasındakı qəza haqda iki yazıya görə M.Hacıbəyli Cinayət Məcəlləsinin 281.2 (dövlət əleyhinə yönələn açıq çağırışlar), 309.2 (vəzifə səlahiyyətlərini aşma) və 313 (vəzifə saxtakarlığı) maddələri ilə ittiham olunur. Məhkəmə ittihamları təsdiqləsə, M.Hacıbəyli 8 ilədək azadlıqdan məhrum edilə bilər.
M.Hacıbəyli ittihamları rədd edir. Bildirir ki, rəhbərlik etdiyi saytdakı yazılarda dövlət əleyhinə çağırışlardan söhbət gedə bilməz.
Maraqlı xəbərlər üçün Az24saat.org FACEBOOK səhifəmizi izləyin
