”Nardaran işi”: Məhkəmədə ”İstefa!”, ”Azadlıq!” şüarları səsləndirilib
Hakim vəkillərdən Vəkillər Kollegiyasına şikayət edəcək
Sentyabrın 23-də Bakı Ağır Cinayətlər Məhkəməsində “Müsəlman Birliyi” Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin məhkəmə prosesi keçirilib.
İclasda vəkil Yalçın İmanov Abbas Hüseynovun prosesdə iştirakının təmin olunması barədə vəsatət verib. Vəkil bildirib ki, əks halda şahidlərin dindirilməsində iştirak etməyəcəklər. Digər vəkillər və təqsirləndirilənlər vəsatəti müdafiə ediblər. Prokuror Nəsib Bayramov isə bildirib ki, təqsirləndirilən şəxslər məhkəmənin xəbərdarlığına məhəl qoymurlar. Prokuror bildirib ki, vəkillərin vəsatəti süründürməçiliyə xidmət edir. Məhkəmə vəsatəti təmin etməyib. Taleh Bağırzadə isə hakim Əlövsət Abbasovdan soruşub: “26 sentyabr referendumdan sonra İlham Əliyev şah, yoxsa kral olacaq?” Hakim suala cavab verməyib. Daha sonra təqsirləndirilən şəxslər “İstefa”, “Azadlıq” şüarları səsləndiriblər.
Hakim prosesi sentyabrın 28-nə təxirə salıb və vəkillər haqqında Vəkillər Kollegiyasına şikayət edəcəyini deyib. (Meydan TV)
