Neft emalı zavodları sovetdən qalıb
İlham Şaban: “Bu zavodların tam gücüylə işləməsinə dövlətin gücü çatmır”
Energetika naziri Natiq Əliyev xam neftin istehlakıyla bağlı məsələlərdən danışıb. Bu gün Bakıda keçirilən beynəlxalq forumda çıxış edən nazir Azərbaycanda illik xam neft istehlakının 6,5 milyon ton səviyyəsində olduğunu deyib (“APA-Economics”).
Nazirin sözlərinə görə, ölkə ərazisində fəaliyyət göstərən neft emalı müəssisələri, ölkənin xam neftlə təchizatı və neft məhsullarının istehsalı SOCAR-ın inhisarındadır: “Azərbaycanda fəaliyyət göstərən neft emalı zavodlarının ilkin emal üzrə ümumi illik istehsal gücü 18 mln. ton təşkil edir. Lakin istehsal gücünün yalnız 30 faizindən istifadə olunur. Zavodlar hələ SSRİ dövründə tikilib və istismara verilib. Müstəqil dönəmində həmin zavodlarda cüzi yenidənqurma işləri aparılıb. Burada neftin dərin emalını həyata keçirmək mümkün olsa da, zavodlarda nisbətən sadə texnologiyalardan istifadə olunur”.
Neft sahəsi üzrə ekspert İlham Şaban bizimlə söhbətində SOCAR-ın indiyədək bir çox iri layihələrə imza atdığını deyir. Şirkətin bu istiqamətdə bir sıra sosial layihələri də olub. Lakin SOCAR-a istər 2008-ci ildə verilən irimiqyaslı layihə, yaxud Qaradağda yeni neft emalı zavodunun tikintisi məsələsi reallaşa bilməyib. 2015-ci ildə Heydər Əliyev adına neft emalı zavodunun yenidən qurulması da zavodun modernləşdirilməsi qərarıyla nəticələnib:
“Belə iri layihələrdə dövlət “ayağını yorğanına görə uzadır”. Hazırda neft məhsullarının illik emal gücü 6,5 milyon tondur. 2019-cu ildə isə bu, 7,5 milyon olacaq. Real güc buna hesablanıb. Məsələnin mahiyyəti odur ki, neft emal edən zavodların tam gücü ilə işləməsinə dövlətin gücü çatmır”.
Nigar
24saat.org
Mənbə – azadliq.info