Obama-nın sərəncamı müzakirəyə çıxarılır
Aprelin 18-də ABŞ Ali Məhkəməsində Prezident Barack Obama-nın qanunsuz miqrantların deportasiya olunmamasına dair sərəncamıyla bağlı şifahi arqumentlər dinlənəcək.
Bu iş ABŞ-ın immiqrasiya siyasətinə təsir göstərə, ölkədə prezident seçkisi kampaniyasında immiqrasiya mövzusu üzrə müzakirələri gücləndirə bilər.
Obama həmin sərəncamı 2014-cü ildə imzalayıb, Konqresin dövlətin immiqrasiya sisteminə gərəkən islahatları qəbul etmədiyini bildirib. Ancaq aşağı instansiya məhkəməsi sərəncamı rədd edib.
Sərəncamda qanunsuz miqrantların deportasiyadan qorunması, uşaqları ABŞ-da doğulmuş xeyli sayda sənədsiz qeyri-vətəndaşlara iş izninin verilməsi nəzərdə tutulur.
Ölkə qanunvericiliyinə görə, övladı Birləşmiş Ştatlarda dünyaya gəlmiş istənilən şəxs ABŞ vətəndaşı hesab olunur.
