Ölkəyə pul gətirilməsi və çıxarılması ilə bağlı yeniliklər
Bu gün, iyunun 6-sı Milli Məclisin İqtisadi siyasət, sənaye və sahibkarlıq, Hüquq siyasəti və dövlət quruculuğu komitələrinin birgə iclası keçirilib.
Milli Məclisin mətbuat xidmətinin yaydığı məlumata görə, komitə sədri Ziyad Səmədzadə bildirib ki, iqtisadi islahatların daha da dərinləşməsi istiqamətdə görülən işlərlə bağlı bir sıra qanunlara dəyişikliklərin edilməsi nəzərdə tutulub. Dəyişikliklərin əksəriyyəti uyğunlaşdırma məqsədi ilə aparılıb və prezidentdən gəlib.
Maliyyə Bazarlarına Nəzarət Palatasının Maliyyə Monitorinqi Xidmətinin direktoru Anar Salmanov isə deyib ki, “Valyuta tənzimi haqqında” qanunda 14-1-ci maddə yeni redaksiyada təklif olunur. Düzəlişə əsasən, müvafiq icra hakimiyyəti orqanı valyuta sərvətlərinin Azərbaycana gətirilməsi, çıxarılması zamanı cinayət yolu ilə əldə edilmiş pul vəsaitlərinin və ya terrorçuluğun maliyyələşdirilməsinin izlərini aşkar etdikdə tədbir görməlidir. Əldə olunmuş sənədlər aidiyyəti üzrə cinayət təqibini həyata keçirən orqana göndərməli, habelə bu barədə məlumatı maliyyə monitorinqi orqanına təqdim etməlidir.
Müzakirələrdə vurğulanıb ki, burada məqsəd gömrük orqanları belə hallar aşkarlayanda, bunun maliyyə monitorinqi orqanına ötürülməsi məsələlərini müəyyən etməkdən ibarətdir.
Daha sonra bir sıra qanunlara texniki düzəlişlər edilib.
24saat.org
Mənbə – azadliq.org