Ombudsman ‘İnsan Hüquqları Aylığı’ keçirir
Ombudsman Aparatı mayın 18-dən iyunun 18-ə kimi Azərbaycanda “İnsan Hüquqları Aylığı” elan edib.
Qurumun xəbərində aylığın ombudsmanın təşəbbüsü ilə keçirildiyi bildirilir.
Ombudsman ay ərzində ötən dövrlərdəki fəaliyyəti bir daha nəzərdən keçirmək, əldə edilən nailiyyətləri, habelə qarşıda duran məsələləri müəyyənləşdirmək niyyətindədir.
Həmin aylıq çərçivədə əhalinin müxtəlif qruplarını əhatə etməklə insan hüquqlarını, hüquq bərabərliyi üzərində qurulmuş multikulturalizm dəyərlərini təbliğ edən mövzularda konfrans və müxtəlif tədbirlərin keçirilməsi planlaşdırılır. Ombudsman hesab edir ki, bu tədbirlər Azərbaycanda hüquq mədəniyyətinin daha da inkişaf etdirilməsinə, insan hüquqlarının müdafiəsinə töhfə olacaq.
Azərbaycanda hər il iyunun 18-i “İnsan Hüquqları Günü” kimi qeyd olunur. Bununla bağlı ölkə başçısı 2007-ci ilin iyunun 18-də sərəncam imzalayıb.
Azərbaycanda Ombudsman Aparatına birmənalı münasibət yoxdur. Bəzi hüquq müdafiəçiləri hesab edir ki, bu qurum siyasi əsaslarla hüquqları tapdalanan şəxslərin yox hökumətin müdafiəçisi qismində çıxış edir. Ombudsman Aparatı bu fikirləri qəbul etmir.
24saat.org
Mənbə – azadliq.org