Artıq yanvar ayının 1-dən parlamentin deputatları yeni ilə yeni və yüksək artımla başlayıblar. Az24saat.org xəbər verir ki, bi barədə Mia.az-a adının çəkilməsini istəməyən deputat köməkçilərindən biri məlumat verib.
Onun sözlərinə görə, Milli Məclisin xərclər smetası üzrə qəbul edilmiş 10 787 420 manat həcmində mövcud əmək haqqı fonduna 2019-cu ilin Dövlət büdcəsindən 11 100 000 manat da əlavə olunub.
Bundan sonra MM üzvləri yanvar ayının 1-dən hər ay ümumilikdə aşağıdakı məbləğdə faktiki vəsait alırlar:
1. Parlamentin sədri: 7424 manat (əvvəl – 3 712 manat)
2. Sədrin birinci müavini: 6680 manat (əvvəl – 3 340 manat)
3. Sədrin müavini: 6308 manat (əvvəl – 3154 manat)
4. Komitə sədri: 5940 manat (əvvəl – 2970 manat)
5. Komitə sədrinin müavini: 5568 manat (əvvəl – 2 784 manat)
6. Sıravi deputat: 5196 manat (əvvəl – 2 598 manat)
Məlumata görə, yanvar ayının 1-dən deputatlarla yanaşı, Milli Məclisin Aparat işçilərinin maaşı da təxminən iki dəfə qalxıb:
“Təəssüf ki, bu cür yüksək artımlar deputat köməkçilərinə, MM-in ekspertlərinə şamil olunmadı. Halbuki, bu gün deputat köməkçiləri MM-in aparatına toplanmış, ancaq demək olar ki, gün keçirməklə məşğul olan məmur balalarından çox əziyyət çəkir, işləyirlər. Əgər o məmur balaları MM-ə karyera kimi baxırsa, biz iş yeri kimi baxırıq. Onlardan fərqli olaraq, deputat köməkçiləri həm yerlərdə seçicilərlə görüşür, problemlərini araşdırır, həm də qanunvericilik məsələləri ilə məşğul olurlar. Yəni əlavə o qədər xərclərimiz çıxır ki, bu da aldığımız 800 manat civarındakı maaşa uyğun deyil”.
Məlumata görə, problemlə bağlı Milli Məclisin Maliyyə idarəsi ilə yanaşı, İşlər idarəsinin müdiri Firudin Hacıyevə də müraciət olunub. Lakin bu müraciətlər faydasız olub: “Nəticədə deputat köməkçiləri, ekspertlər, sürücülər və xadimələr bu artımdan kənarda qalıblar”.
Məsələ ilə bağlı bir neçə deputatından münasibət öyrənmək istədik. Lakin hər biri müxtəlif bəhanələrlə suallardan yayınaraq, aylıq maaşlarını açıqlamadılar.
Mili Məclisə isə iki dəfə rəsmi sorğu göndərsək də, suallarımız cavabsız buraxıldı.
***
Milli Məclisin (MM) mətbuat xidmətinin rəhbəri Akif Təvəkküloğlu Oxu.az-a deyib ki, bu məsələdən ümumiyyətlə, xəbərsizdir: “Çox istərdim ki, artım olsun. Amma düzünü deyim ki, bu məsələni birinci dəfədir eşidirəm. Əgər belə bir məsələ olsaydı, yəqin ki, eşidərdik”.
***
“Azərbaycanda deputatlar yeni ildən əmək haqları ilə yanaşı, ezamiyyət xərclərini də almağa başlayıblar”.
Mia.az xəbər verir ki, bu sözləri isə Unikal.org-a Milli məclisin iqtisadi siyasət, sənaye və sahibkarlıq komitəsinin üzvü Rüfət Quliyev deyib.
Bildirib ki, artım yalnız deputatların səfərləri və bəzi xərcləri üçün nəzərdə tutulub: “Misal üçün deputatlar rayonara, xarici səfərlərə tez-tez gedirlər. Bununla belə, xaricdən qonaqlarımız da gəlir. Əvvəllər bu məsələlərə görə deputatlara vəsait verilmirdi. Yeni ildən sözügedən məsələlərə görə vəsait ayrılır”.
***
Parlamentin Əmək və sosial siyasət komitəsinin sədri Hadi Rəcəbli də Modern.az-a açıqlamasında deyilənləri təkzib edib.
O bildirib ki, gələcəkdə deputatların maaşında artım ola bilər, amma hazırda heç bir artım yoxdur.
H.Rəcəbli deputatların maaşlarında artımın olma ehtimalını belə əsaslandırıb ki, bir çox sahələrdə əməkhaqqı artımları baş veribsə, parlamentdə də ola bilər.
Qeyd edək ki, “Azərbaycan Respublikası Milli Məclisi deputatının statusu haqqında” qanuna dəyişiklik edilib.
Qanunun 21-ci (Deputatın maddi təminatı) maddəsinə əsasən, Milli Məclisin sədri 2475 manat sədrin I müavini 2227 manat Milli Məclis sədrinin müavini 2103, Milli Məclisin komitə sədri 1980, komitə sədrinin müavini 1 856, sıravi deputat isə 1732 manat maaş alır.
Milli Məclisin sədri onun birinci müavini və müavinləri, Milli Məclisin komissiya sədrləri və onların müavinləri, Milli Məclisin deputatları deputatlıq səlahiyyətlərinin yerinə yetirilməsi ilə əlaqədar xərclərin ödənilməsi üçün vəzifə maaşlarının 50 faizi məbləğində vergilərdən azad olunan aylıq pul təminatı alırlar.
Bu məbləğ də nəzərə alınarsa, parlamentin sədri 3 min 712 manat 50 qəpik, sədrin I müavini 3 min 340 manat 50 qəpik, Milli Məclis sədrinin müavini 3 min 154 manat 50 qəpik, Milli Məclisin komitə sədri 2 min 970 manat, komitə sədrinin müavini 2 min 784 manat, sıravi deputat isə 2 min 598 manat maaş alır.
Maraqlı xəbərlər üçün Az24saat.org saytının FACEBOOK səhifəsini izləyin
