“Petkim” 1,3 mlrd TL xalis gəlirlə ən yüksək rüblük göstəriciyə nail olub
Türkiyənin ən böyük sənaye holdinqi “SOCAR Türkiyə”nin törəmə müəssisəsi “Petkim” 2021-ci ilin ikinci rübünün nəticələri ilə tarixində ən yüksək maliyyə göstəricilərinə nail olub.
1 milyard 325 milyon TL həcmində xalis gəlir əldə edən “Petkim” ümumi dövriyyəsini 7 milyard 397 milyon TL-yə yüksəldərək hər iki göstərici üzrə rekord nəticəyə imza atıb.
Bu barədə “SOCAR Türkiyə” məlumat yayıb.
“Beləliklə, şirkətin ilk 6 aylık xalis gəliri 2 milyard 216 milyon TL-yə çatdı. “Petkim”in qurulduğu gündən bu vaxtadək əldə etdiyi ən yaxşı göstərici kimi tarixə düşən maliyyə nəticələrində neft-kimya sektorunda qlobal miqyasda müşahidə olunan müsbət şəraitin təsiri hissolunacaq dərəcədədir. Ötən rübdə uğurlu nəticələrə səbəb olan fəaliyyət göstəricilərinin artması ilə yanaşı, xərclərdəki qlobal artımın məhsulun qiymətlərindəki qlobal yüksəlişdən az olması “Petkim”in gəlirini artıran ən mühüm amillərdən biri olub”, – məlumatda bildirilir.
“Qlobal dönüşləri düzgün qiymətləndirərək sürətli və düzgün addımlar atdıq”
“Petkim”in 2021-ci ilin ikinci rüb maliyyə göstəricilərini dəyərləndirən “SOCAR Türkiyə” Emal və Neft-Kimya Bölməsinin rəhbəri və “Petkim”in Baş direktoru Anar Məmmədov qeyd edib ki, neft-kimya bazarında Asiya və Amerika ilə əlaqəli tədarük zəncirindəki qırılmalarla yanaşı ehtiyacdan artıq alışın yaratdığı tələb “Petkim”in də istehsalçısı olduğu məhsulun qiymətlərində qlobal bir yüksəlişə yol açıb. Onun sözlərinə görə, peyvəndləmənin genişlənməsi ilə əlaqədar pandemiyanın bitəcəyi barədə gözləntilər də ümumi tələbə təkanverici təsir göstərmiş və müşahidə olunan bütün bu dönüşlər “Petkim”in rekord səviyyəyə çatan gəlirində öz əksini tapıb.
Anar Məmmədov deyib: “İstehsal xərclərinin ötən ilə nisbətən 110 %, naftanın qiymətinin isə 60 % artdığı bir dövrdə STAR NEZ ilə fasiləsiz inteqrasiyalı istehsalımız “Petkim”də gəliri yüksəldən digər bir mühüm hərəkətverici qüvvə oldu. İstehsal gücündən istifadəni də ötən ilin müvafiq rübünə nisbətən 2,5 % artıran “Petkim”, məlum olduğu kimi, eyni zamanda məhsul satışı ilə yanaşı ticari satışlar da həyata keçirir. Bu satışlardakı artım da rekord gəlirə mühüm töhfə verib. Hesabat dövründə reallaşan 7 milyard 397 milyon TL-lik ümumi dövriyyənin 2 milyard 649 milyon TL-si ticari satışların payına düşüb. Əldə etdiyimiz bu yüksək maliyyə göstəricisinə müasir qlobal dönüşləri düzgün qiymətləndirərək sürətli və düzgün addımlar atmağımızın da böyük rolu olub. Əldə etdiyimiz gəliri düzgün dəyərləndirərək qısamüddətli borclarımızı da təxminən 90 milyon ABŞ dolları azaltdıq.
Bu isə xalis faiz məsrəflərimizi azaltdığı üçün xalis gəlirimizə də müsbət təsir göstərdi. Bütün bunlarla yanaşı, aktivlərimizi 23 %, kapitalımızı 29 % artıraraq maliyyə mövqeyimizi gücləndirdik. Düşünürəm ki, pandemiya səbəbindən dalğalanmaların hələ də davam etdiyi bir şəraitdə nümayiş etdirdiyimiz bu uğurlar qlobal rəqabətdəki mövqeyimizi daha da möhkəmləndirəcək. Qazanılmış nailiyyətlərdə əməyi olan bütün əməkdaşlarımıza və tərəfdaşlarımıza təşəkkür edirəm”.
Onun sözlərinə görə, istehsal gücündən 95 % istifadə etmək və ümumi dövriyyə 7 milyard 397 milyon TL-yə çatdırmaqla şirkətin tarixində “rekord rəqəmlərə nail olduq və güclü bir maliyyə göstəricisi ortaya qoyduq”.
report
Bizi sosial şəbəkələrdən izləyin!!
