Putin Əliyevə zəng vurub
Mayın 10-da Rusiya prezidenti Vladimir Putin Azərbaycan prezidenti İlham Əliyevə telefonla zəng edib.
Bu barədə Azərbaycan prezidentinin mətbuat xidməti məlumat yayıb.
Məlumata görə, dövlət başçıları faşizm üzərində Qələbənin 76-cı ildönümü münasibətilə bir-birini təbrik edərək vurğulayıblar ki, hər iki ölkədə xilaskar döyüşçülərin şücaəti haqqında xatirə müqəddəs tutulur, misilsiz qəhrəmanlıq və fədakarlıq göstərmiş veteranlara dərin minnətdarlıq bildirilir.
“Hər iki tərəfin Rusiya-Azərbaycan hərtərəfli qarşılıqlı fəaliyyətinin daha da genişləndirilməsi əzmində olduğu təsdiqlənib. Söhbət zamanı dövlət başçıları müxtəlif səviyyəli təmasların bundan sonra da davam etdiriləcəyini vurğulayıblar”, – məlumatda yazılıb.
Bu gün, mayın 10-da Rusiya xarici işlər naziri Sergey Lavrovun da Azərbaycana gəlişi gözlənir. Onun Azərbaycandan olan həmkarı Ceyhun Bayramovla və prezident İlham Əliyevlə görüşü nəzərdə tutulur.
“24 saat” “Putin Əliyevə zəng vurub” başlıqlı yazını “Azadlıq Radiosu”na istinadən dərc edib.
