Şahdağ Milli Parkının Qəbələ bölməsinin Vəndam meşəbəyliyinin 2 saylı dolayında yol uçub.

Bu Qəbələ-Laza avtomobil yolunun 4,4-cü kilometrliyinə düşür.

Saytların yığılması

Aprelin 17-də baş verən olayda avtomobil yolunun sol hissəsi tamamı ilə çöküb.

Bu haqda bu gün, aprelin 18-i Ekologiya və Təbii Sərvətlər Nazirliyinin mətbuat xidməti məlumat yayıb.

Nazirlik uçqunun bölgəyə intensiv və güclü yağışların yağması səbəbindən baş verdiyini, yolda hərəkətin dayandığını bildirir.

Milli Parkın olay yerinə cəlb olunan əməkdaşları müəyyən ediblər ki, uçqunun əhatə etdiyi ərazi yoldan 50-60 metr hündürlükdədir.

Təxminən 4 sota yaxın meşə ilə örtülü olmayan ərazini əhatə edir.

Uçqunla bağlı əlaqəli qurumlar məlumatlandırılıb.

Hazırda yolun açılmasından ötrü təmizləmə işlərinin aparıldığı bildirilir.

Ərazidə təhlükəsizliyin təmin olunması məqsədilə Milli Parkının işçilərinin keşik çəkdiyi deyilir.