Çin Covid-19 epidemiyası ilə mübarizədə həyata keçirdiyi “Sıfır-Covid” strategiyası çərçivəsində sərt tədbirlər görməyə davam edir. Oktyabrın 29-da Şanxayda 10 yerli Covid-19 hadisəsi aşkar edildikdən sonra şəhərdəki Disneyland əyləncə parkı son 1 ildə ikinci dəfə karantinə alınıb.
Parka gələn ziyarətçilərin testi mənfi çıxmadan parkı tərk edə bilməyəcəyi bildirilsə də, oktyabrın 27-dən parka gələn hər kəsdən üç gün ərzində üç dəfə testdən keçmələri xahiş olunub. Parkda neçə nəfərin qaldığı açıqlanmayıb.
Covid-19 qaydalarına uyğun olaraq əyləncə parkı və ətrafının yerli vaxtla saat 11.30-da bağlandığı açıqlanıb. Bildirilib ki, parka giriş-çıxış qadağan edildikdən sonra içəri daxil olan bütün ziyarətçilər sınaqdan keçiriləcək və nəticəsi mənfi olanların parkı tərk etməsinə icazə veriləcək.
Keçən ilin noyabr ayında Covid-19 səbəbiylə 30 mindən çox ziyarətçi ilə əyləncə parkı iki gün ərzində karantində qaldı.
Bildirilib ki, Çinin Zhengzhou şəhərində dünyanın ən böyük iPhone istehsal bazası kimi tanınan fabrikdə aşkar edilən Covid-19 hadisəsi ilə əlaqədar müəssisə oktyabrın 27-də qapalı dövrə istehsalına başlayıb və karantinə alınıb. Fabrikin sahibi Foxconn tərəfindən dünən edilən açıqlamada, könüllü olaraq müəssisədə qalmaq və ya tərk etmək istəyən bütün işçilərin təhlükəsizliyi üçün lazımi tədbirlər görüləcəyi, işçilərin hüquqlarının qorunacağı bildirilib. Bildirilib ki, “Foxconn” şirkətinin müəssisəsində karantin tətbiqləri hələ də davam edir, müəssisədə “qapalı dövrə idarəetməsi” tətbiq edilir, işçilərə hər gün PCR testləri keçirilir. Fabrikdə fəaliyyətin və istehsalın nisbətən sabit olduğu qeyd edilib, “az sayda” insanın epidemiyadan təsirləndiyi bildirilib, lakin dəqiq rəqəm verilməyib. (İHA)
Tərcümə“24 SAAT”
