SEÇMƏ

Rəsmi Bakı: Paşinyan İlham Əliyevin Şuşadakı çıxışını təhrif edib

Yayımlandı: 11 Noyabr 2022 12:40

Ayxan Hacızadə: “Ermənistan üçtərəfli bəyanatın prinsiplərini pozur, vəziyyəti gərginləşdirir”

“Üçtərəfli bəyanata zidd olaraq hələ də Azərbaycan ərazilərindən tam çıxarılmayan və bölgə üçün təhdid törətməkdə davam edən erməni silahlı birləşmələrinin müxtəlif hərbi təxribatlarına Azərbaycanın verdiyi adekvat cavablar qanunidir”.

Azərbaycan Xarici İşlər Nazirliyinin (XİN) mətbuat xidmətinin rəisi Ayxan Hacızadə Ermənistanın Baş naziri Nikol Paşinyanın noyabrın 10-da hökumət iclasında səsləndirdiyi fikirlərə cavabında belə deyib.

Hacızadə bildirib ki, Paşinyan Azərbaycan Prezidentinin noyabrın 8-də Şuşadakı çıxışını təhrif edib.

Onun sözlərinə görə, Ermənistan üçtərəfli bəyanatın 9-cu bəndi ilə üzərinə götürdüyü öhdəliyi pozaraq Azərbaycanın qərb bölgələrinin Naxçıvanla kommunikasiyalarının açılması prosesini yubadır:

“Azərbaycan isə, öz növbəsində, yeni Laçın yolunu çəkməklə öz öhdəliyini dürüst şəkildə yerinə yetirir. Belə olduğu halda, Ermənistan Baş nazirinin Azərbaycanın Laçın yolunu bağlamaq niyyətində olduğunu iddia etməsi bölgədə vəziyyətin qəsdən gərginləşdirilməsindən başqa bir şey deyil”.

İlham Əliyev nəinki Dağlıq Qarabağ ermənilərini təhdid edir, o, həmçinin soyqırımına hazırlaşır”, – Ermənistanın Baş naziri Nikol Paşinyan hökumətin 10 noyabrda keçirilən iclasında çıxışı zamanı belə deyib.

O bildirib ki, Dağlıq Qarabağ ermənilərinin təhlükəsizliyi və hüquqları ilə bağlı məsələlərdə beynəlxalq təminatlar olmadan sülhməramlıların geri çəkilməsi doğru deyil.

“Sülhməramlıların geri çəkilməsi söhbətlərinin getməsi təkcə üçtərəfli bəyannamələrin pozulması deyil, həm də Dağlıq Qarabağ ermənilərinin soyqırımına hazırlıqdır”, – Paşinyan bildirib.

10 noyabr 2020-ci ildə qəbul edilən üçtərəfli atəşkəs sazişinə əsasən, Rusiya sülhməramlıları 5 il müddətinə Azərbaycanın Dağlıq Qarabağ bölgəsinə yerləşdirilib.

Nikol Paşinyan hesab edir ki, Dağlıq Qarabağ ermənilərinin hüquqları və təhlükəsizliyi ilə bağlı məsələlər həll olunanadək sülhməramlıların səlahiyyət müddəti artırılmalıdır:

“Ermənistanın yeganə öhdəliyi Azərbaycanın qərb rayonları ilə Naxçıvan arasında nəqliyyat əlaqəsini təmin etməkdir. Heç bir bəyanatda konkret marşrut qeyd olunmayıb. Bir neçə gün əvvəl Şuşada Azərbaycan qələbə günü münasibətilə tədbir keçirib. Mərasimdə Əliyev: “Zəngəzur dəhlizi Ermənistanın öhdəliyidir”, – deyib. Belə çıxır ki, o, bizi öhdəliklərimizi yerinə yetirməməkdə suçlayıb. Mənsə belə anlayıram ki, Azərbaycan Laçın dəhlizini bağlayıb, Dağlıq Qarabağ ermənilərini mühasirəyə alıb, orada soyqırımı törətmək istəyir”.
Noyabrın 8-də Şuşada Zəfər Günü münasibətilə təşkil olunan tədbirdə Azərbaycan Prezidenti İlham Əliyev deyib ki, Ermənistan iki il əvvəl – noyabrın 10-da üzərinə götürdüyü öhdəliyi yerinə yetirməyib.

O bildirib ki, erməni silahlı qüvvələri hələ də Qarabağdadır.

Əliyevin sözlərinə görə, Azərbaycanın səbri tükənməz deyil:

Gözdən qaçırmayın:  SORĞU: Rusiya sülhməramlılarının Qarabağda qalma müddəti uzadılmalıdırmı?

“Erməni silahlı qüvvələri Qarabağda nə gəzir? Bir daha xəbərdarlıq etmək istəyirəm: Ermənistan öhdəliklərini yerinə yetirilməsə, Azərbaycan lazımi addımlar atacaq”.

2020-ci ildə 44 günlük İkinci Qarabağ müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa edib.

Azərbaycan, Ermənistan və Rusiya rəhbərliyinin imzaladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olub.
1994-cü ildə gerçəkləşən atəşkəs razılaşmasına qədər Ermənistan Azərbaycanın Dağlıq Qarabağ bölgəsi və ona bitişik 7 rayonunu işğal edib.

Meydan TV

This site uses Akismet to reduce spam. Learn how your comment data is processed.

Back to top button