Yanvarın 2-si saat 18:00 radələrində Dövlət Sərhəd Xidmətinin Sərhəd Qoşunlarının “Qubadlı” əlahiddə sərhəd diviziyasının xidməti ərazisində müddətdən artıq həqiqi hərbi xidmət hərbi qulluqçusu 3 hərbi yoldaşını qətlə yetirərək qaçıb.
Bu barədə Dövlət Sərhəd Xidməti məlumat yayıb. Məlumatda deyilir
“…kiçik çavuş Əvəzli Elxan Məhəmməd oğlu naməlum səbəbdən öz xidməti silahından atəş açmaqla xidmət etdiyi sərhəd zastavasının hərbi qulluqçuları baş leytenant İsmayılov Yusif İsmayıl oğlunu, kiçik gizir Cəlilzadə Amil Fuar oğlunu və kiçik gizir İbrahimov Rəfail Natiq oğlunu qətlə yetirmişdir. Bundan sonra baş çavuş E.Əvəzli silahını ataraq hadisə yerindən qaçmışdır”.
Məlumatda hazırda kiçik çavuş E.Əvəzlinin axtarışı üzrə tədbirlər davam etdirildiyi vurğulanır.
Qeyd olunur ki, Dövlət Sərhəd Xidmətinin və Baş Prokurorluğun əməkdaşları tərəfindən hadisə ilə bağlı müvafiq tədbirlər həyata keçirilir.
Mənbə: AzadlıqRadiosu
“24 saat”
