Rəsmi: İrana məxsus hərbi təyyarə Azərbaycan sərhəddinin yaxınlığında uçuşlar edib-Bakıdan nota
Hadisə ilə bağlı İranın Azərbaycandakı səfirinin XİN-ə çağırıldığı və ona norta verildiyi bildirilir
Bakı martın 11-də İrana məxsus hərbi təyyarənən Azərbaycan sərhəddinə yaxın uçuşlar etdiyini bildirir.
İki dövlət qurumunun-Xarici və Müdafiə nazirliklərinin birgə yaydığı məlumatda bildirilir ki, martın 11-i İrana məxsus hərbi təyyarə saat 09:44-dən 10:26-dək fasiləsiz olaraq Azərbaycan-İran dövlət sərhədi boyunca, Zəngilan rayonu istiqamətindən Biləsuvar rayonu istiqamətinə və geriyə doğru uçuş həyata keçirib.
Qeyd olunur ki, təyyarə iki ölkə arasında dövlət sərhədindən 3-5 km məsafədə, bəzi hallarda isə dövlət sərhədinin tam üstü ilə uçub.
“Hərbi təyyarələrin dövlət sərhədinə yaxınlaşması ilə bağlı qonşu dövləti əvvəlcədən xəbərdarlıq etməyə dair beynəlxalq aləmdə qəbul olunmuş təcrübəyə zidd olaraq, İran İslam Respublikasının hərbi təyyarəsinin iki ölkə arasında dövlət sərhədinə bu qədər yaxınlaşması və sərhəd xətti üzərindən uçması mülki aviasiyanın təhlükəsizliyinə təhdid törədir və iki ölkə arasında münasibətləri daha da gərginləşdirməyə xidmət edir.” -birgə bəyanatda vurğulanır.
Xarici və Müdafiə nazirliklərinin bəyanatında bildirilir ki, “işğaldan azad edilmiş Azərbaycan ərazilərinin yaxınlığında yarım saatdan çox müddət ərzində hərbi təyyarənin uçuşu Azərbaycana qarşı təxribat və qeyri-dost davranışdır” .
Bəyanatda həmçinin İran tərəfinin ötən il də Araz çayı boyunca Azərbaycan sərhədləri yaxınlığında genişmiqyaslı hərbi təlimlər keçirdiyi xatırladılır.
“İran tərəfini bu cür təhrikçi addımına görə şiddətlə qınayır, müvafiq izahat verməyə və gələcəkdə belə təxribatçı addımlardan çəkinməyə çağırırıq.”
O da qeyd olunur ki, martın 11-də İranın Azərbaycandakı səfiri Seyid Abbas Musəvi Azərbaycan Xarici İşlər Nazirliyinə çağırılıb və ona müvafiq etiraz notası təqdim olunub.
Hələki bu məsələyə İran tərəfinin mövqeyi bəlli deyil.
Xatırlatma
Hazırda İranla Azərbaycanın münasibətlərində müəyyən gərginliklər var.
Bu il yanvarın 27-də Azərbaycanın İrandakı səfirliyinə silahlı hücum olub. Səfirliyin mühafizə xidmətinin bir əməkdaşı həlak olub, ikisi yaralanıb. Bundan sonra səfirliyin əməkdaşları Azərbaycana təxliyə olunub. İran tərəfi hadisənin araşdırıldığını bəyan edib.
